Vens: Eron urushni tugatish uchun yadro boyitish salohiyatini kamaytirishi shart
AQSh vitse-prezidenti J.D. Vensning ma'lum qilishicha, Eron AQSh talablarini qondirish va yetti oylik urushni yakunlash uchun yadroviy boyitish salohiyatini sezilarli darajada qisqartirishi kerak. Uning ta'kidlashicha, Vashington muzokaralarda Tehronning qanday qaror qabul qilishini to'liq tushunmayapti.
Reuters agentligiga bergan eksklyuziv intervyusida Vens har qanday kelishuv Eron yadro boyitish quvvatini kamaytirishni talab qilishini, faqat kelajakdagi kafolatlar bilan cheklanib qolmasligini aytdi.
"Agar siz yadroviy qurolni xohlamasangiz, unda nima uchun 60 foiz boyitilgan yoqilg‘iga ehtiyoj bor? Agar yadroviy qurol qurmaslikka sodiqlik ko‘rsatmoqchi bo‘lsangiz, yuqori darajada boyitilgan yoqilg‘ini ishlab chiqmang," dedi Vens.
Eron rahbariyatidagi noaniqlik
Vens Vashington Tehronda kim aslida qaror qabul qilishini aniq bilmasligini tan oldi. Oq uy Eron prezidenti Masud Pezeshkian va tashqi ishlar vaziri Abbos Araqchi bilan muzokaralar olib borayotgan bo‘lsa-da, urush boshida AQSh-Isroil qo‘shma zarbalari natijasida Oliy rahbar Ali Xomaniy halok bo‘lganidan keyin ularning hokimiyat tuzilmasidagi haqiqiy vakolati qanchaligi noma'lumligicha qolmoqda.
Prezident Donald Tramp ham seshanba kuni o‘zining "eng katta muammosi" Eronni hozirda aniq kim boshqarayotganini hech kim bilmasligidan iborat ekanini ta'kidlagandi. Eron Tashqi ishlar vazirligi matbuot kotibi Ismoil Bag‘oiy esa AQSh rasmiylari Eronning qaror qabul qilish tizimini yaxshi bilishini aytib, bu da'volarni rad etdi.
Muxolifat va siyosiy ta'sir
Intervyu davomida Vens front komandirlari bilan shaxsan gaplashib, jang mayolidagi vaziyatni baholaganini, muhim o‘q-dorilar yetishmovchiligi haqidagi xavotirlar asossiz ekanini bildirdi. Shuningdek, u Eron qo‘shinlari vaqti-vaqti bilan Hormuz bo‘g‘ozidagi tijorat kemalariga hujum qilsa-da, energiya eksportini to‘liq to‘xtatib qo‘ya olmasligini qo‘shimcha qildi.
Mazkur urush va uning oylik 3 milliard dollarlik narxi siyosiy maydonda asosiy muammoga aylanib, energiya narxlarining oshishi fonida respublikachilar uchun Kongress saylovlarida qo‘shimcha qiyinchiliklarni keltirib chiqarmoqda. Oq uyda Trampning o‘rnini egallash uchun asosiy nomzod sifatida ko‘rilayotgan Vens esa 2028-yilgi prezidentlik saylovlarida qatnashish masalasini hali o‘ylab ko‘rmaganini qayd etdi.
