Dushanba kuni Turkiya poytaxtida, 7–8-iyul kunlari shaharda oʻtkazilishi rejalashtirilgan NATO rahbarlari sammiti arafasida Anqara aeroporti ochildi. Prezident Rejep Tayyip Erdogʻan yangi transport tarmoqlari tashrif buyuruvchi delegatsiyalarning toʻgʻridan-toʻgʻri yetib kelishini taʼminlashini bildirdi.
Anqara aeroportining ochilish marosimida soʻzlagan Erdogʻan ushbu loyihalar poytaxtning aviatsiya hamda transport infratuzilmasini mustahkamlashini, shuningdek, Anqaraning 7–8-iyul kunlaridagi sammitni qabul qilishga tayyorgarlik koʻrayotgani bilan uzviy bogʻliqligini taʼkidladi.
“Ajratilgan yoʻl qismidagi 3 kilometrlik bogʻlovchi yoʻl orqali NATO sammitida ishtirok etuvchi delegatsiyalarning toʻgʻridan-toʻgʻri kelib-ketishini taʼminlaymiz,” dedi u.
Bu poytaxtdagi ikkinchi aeroport boʻlib, birinchisi — ichki va xalqaro reyslarni qabul qiluvchi Esenbogʻa aeroporti hisoblanadi.
Erdogʻan aeroport va unga bogʻliq investitsiyalar rekord muddatda — 230 kunda yakunlanganini maʼlum qildi hamda 6,5 kilometrlik ajratilgan yoʻl va 6 kilometrlik bir qatorli yoʻlni oʻz ichiga olgan jami 12,5 kilometrlik bogʻlovchi yoʻl qurilganini qoʻshimcha qildi.
U ushbu loyihalar orqali Anqara aeroportidan shahar markazigacha 17 kilometrdan ortiq masofani qamrab olgan qulay transport tarmogʻi yaratilganini bildirdi.
Turkiyaning xalqaro diplomatiya markaziga aylanishi
Prezidentning soʻzlariga koʻra, Turkiyaning global siyosatdagi nufuzi ortishi bilan Anqara diplomatik aloqalardagi oʻrnini yildan-yilga mustahkamlab bormoqda.
“Toʻrt soatlik parvoz masofasida joylashgan, jami 1,5 milliard aholi yashaydigan 67 ta mamlakat markazida oʻrin olgan Turkiya endilikda Anqara, Istanbul va Antalya shaharlari bilan xalqaro diplomatiyaning bosh markaziga aylana boshladi,” dedi u.
Erdogʻan, shuningdek, 2026-yilda Turkiyada oʻtkaziladigan bir qator yirik xalqaro tadbirlarni tilga oldi. Jumladan, 5–7-iyun kunlari Istanbulda boʻlib oʻtgan va 183 mamlakatdan 5 000 dan ortiq ishtirokchini jamlagan "Zero Waste" (Chiqindisiz hayot) forumini misol qilib keltirdi.
U Turkiya oktyabr oyida 77-Xalqaro Astronavtika Kongressiga, noyabrda esa Turkiy davlatlar tashkilotining 13-sammitiga hamda COP31 iqlim sammitiga mezbonlik qilishini qoʻshimcha qildi.
Katta fyuzelyajli samolyotlar va rasmiy reyslarga tayyorlangan aeroport
“Anqara aeroporti bilan biz poytaxtimizga nafaqat yangi loyiha olib keldik, balki aviatsiya tariximizda chuqur iz qoldirgan anʼanani qayta jonlantirdik,” dedi Erdogʻan.
U aeroport dastlab 1933-yilda respublika asoschisi Gʻozi Mustafo Kamol Otaturkning koʻrsatmasi bilan qurilganini, uzoq vaqt davomida harbiy aviatsiya markazi sifatida foydalanilganini, ammo endilikda yangi qiyofa va zamonaviy imkoniyatlar bilan qayta tiklanganini aytdi.
Uning taʼkidlashicha, uchish-qoʻnish yoʻlagi uzunligi 2 450 metrdan 3 000 metrgacha uzaytirilgan, eni esa 42 metrdan 60 metrgacha kengaytirilgan va chekkalari toʻliq yangilangan.
Ikki uchish yoʻlagining oxirida jami 15 000 kvadrat metr maydonni tashkil etuvchi burilish platformalari, shuningdek, 160 000 kvadrat metrlik yangi perron (samolyotlar toʻxtash joyi) qurilgan boʻlib, bu bir vaqtning oʻzida 44 ta samolyotning xavfsiz joylashishiga imkon beradi, dedi u.
Erdogʻan uchish-qoʻnish yoʻlagi va taksi yoʻlaklaridagi yoritish tizimlari, yaqinlashish chiroqlari hamda yoʻnaltiruvchi belgilar xalqaro fuqarolik aviatsiyasi standartlariga mos ravishda modernizatsiya qilinganini bildirdi.
Aeroport hududida 4 800 kvadrat metr yopiq maydonga ega Davlat mehmonxonasi (gostiniya) va 310 ta avtomobilga moʻljallangan ochiq avtoturargoh ham barpo etilganini qoʻshimcha qildi.
Erdogʻanning aytishicha, kengaytirilgan uchish-qoʻnish yoʻlagi, yangi perronlar, zamonaviy taksi yoʻlaklari va yangilangan infratuzilma tufayli Anqara aeroporti yirik fyuzelyajli (katta qanotli) samolyotlar va rasmiy parvozlarni qabul qilishga toʻliq shay holatga keltirilgan.
U, shuningdek, yuqori tezlikdagi temiryoʻl liniyasi ustidan oʻtuvchi uzunligi 140 metr boʻlgan "Bashkent Aviatsiya" koʻprigi qurilganini, uning 10 000 tonnalik tayanch palubasi Turkiyada ilgari qoʻllanilmagan maxsus uslub orqali koʻprikka oʻrnatilganini aytib oʻtdi.
Bayram kunlarida Esenbogʻa Turkiyaning toʻrtinchi eng gavjum aeroportiga aylandi
Oxirgi toʻqqiz kunlik bayram taʼtili davomida Turkiya aeroportlarida jami 51 962 ta uchish-qoʻnish amaliyoti bajarildi va 7,6 million yoʻlovchiga xizmat koʻrsatildi, dedi Erdogʻan.
Uning qoʻshimcha qilishicha, bayram kunlarida Esenbogʻa aeroporti 2 557 ta uchish-qoʻnish harakati va 382 000 yoʻlovchi oqimi bilan Turkiyaning toʻrtinchi eng gavjum aeroportiga aylangan.
Prezident bundan 20 yil avval Esenbogʻa yillik 3 million yoʻlovchini qabul qilgan boʻlsa, hozirgi kunda yiliga taxminan 15 million yoʻlovchiga xizmat koʻrsatayotganini taʼkidladi. Yangi Anqara aeroportining ochilishi esa Esenbogʻa yoʻnalishidagi havo hamda avtomobil qatnovi yuklamasini sezilarli darajada yengillashtirishga yordam beradi.
Marosim boshlanishidan avval Erdogʻan oʻtirgan samolyot Anqara aeroportida anʼanaviy suv arkasi (suvli salyut) bilan kutib olindi.
Yaxshi niyatlar va duolardan soʻng, Erdogʻan Anqara aeroporti, "Bashkent Aviatsiya" koʻprigi va bogʻlovchi yoʻllarni rasmiy ravishda ochib berdi.
