Yaponiyaning shimolida ikki haftadan beri davom etayotgan kuchli qor yog‘ishi kamida 30 kishining hayotiga zomin bo‘ldi. Qor to‘planishi tomlarning qulashiga olib kelmoqda. Hududga harbiylar joylashtirildi, shuningdek favqulodda ogohlantirishlar berildi.

Yaponiya rasmiylari seshanba kuni bergan bayonotda, mamlakatda kuzatilayotgan g‘ayrioddiy darajadagi kuchli qor yog‘ishi so‘nggi ikki hafta ichida 30 kishining o‘limiga sabab bo‘lganini ma’lum qildi. Qurbonlardan biri — uyi tashqarisida uch metr balandlikdagi qor uyumi ostida qolib ketgan 91 yoshli ayol.

Markaziy hukumat eng ko‘p zarar ko‘rgan hudud — Aomori prefekturasidagi aholiga yordam berish uchun harbiylarni safarbar qildi. Uzoq va chekka hududlarda qor qalinligi 4,5 metrga yetgan.

Bosh vazir Sanae Takaichi seshanba tongida vazirlarga o‘limlar va baxtsiz hodisalarning oldini olish uchun barcha choralarni ko‘rish bo‘yicha topshiriq berish maqsadida maxsus yig‘ilish o‘tkazdi.

So‘nggi haftalarda kuchli sovuq havo massasi Yaponiya dengizi sohillari bo‘ylab jadal qor yog‘ishiga sabab bo‘ldi. Ayrim hududlarda odatdagidan ikki baravar ko‘p qor yog‘di.

Yong‘in va ofatlarni boshqarish agentligi ma’lumotiga ko‘ra, 20 va 21 yanvar kunlari kuchli qor yog‘ishi oqibatida 30 kishi halok bo‘lgan.

Ular orasida Aomorining Ajigasava shahrida yashagan 91 yoshli Kina Jin ham bor. Uning jasadi uyida qor uyumi ostidan topilgan. Ismini oshkor qilmaslik sharti bilan AFP’ga ma’lumot bergan mahalliy politsiya xodimining aytishicha, tomdan tushgan qor ayolni bosib qolgan va o‘lim sababi bo‘g‘ilish bo‘lgan. Jasad yonidan belkurak topilgan.

Rasmiy AFP’ga shunday dedi: “Havo isishi bilan to‘plangan qor eriydi va qulab tushadi. Bu qor miqdori va haroratga bog‘liq. Tom osti hududlari xavfli.”

Aomori gubernatori Soichiro Miyashita dushanba kuni Yaponiya armiyasidan ofat oqibatlarini bartaraf etishda yordam so‘raganini bildirdi.

Miyashita bu yordamni, ayniqsa yolg‘iz yashaydigan va qor tozalashda ko‘makka muhtoj bo‘lgan keksa aholiga yordam berish uchun so‘raganini aytdi.

Gubernator mintaqa markazi — Aomori shahrida balandligi 1,8 metrga yetadigan qor devorlari hosil bo‘lganini, yo‘llar va uylar atrofida qor tozalash ishlari yetarli darajada olib borilmayotganini ta’kidladi.

Matbuot anjumanida u shunday dedi: “Tomlardan tushayotgan qor yoki qulayotgan binolar sababli o‘lim xavfi mavjud.”