Amaldagi sulh bitimiga qaramay, Isroilning G‘azo sektoriga uyushtirgan yangi havo hujumlari oqibatida, bolalar ham bo‘lgan kamida 9 nafar falastinlik halok bo‘ldi, ko‘plab odamlar yaralandi.
Ash-Shifo shifoxonasidagi manbaning ma’lum qilishicha, Isroil hujumlari natijasida G‘azodagi to‘rtta turar joy nishonga olingan va qurbonlar qayd etilgan.
Manbalarga ko‘ra, Isroil harbiy samolyotlari va vertolyotlari bir vaqtning o‘zida G‘azoning g‘arbiy va shimoliy hududlaridagi uylarni nishonga olgan. Hujumlar Shati qochqinlar lageri, Shayx Ridvon mahallasi, Tal al-Havo tumani va Muhabarat hududida amalga oshirilgan.
Eng qonli hujum Muhabarat hududidagi Labidlar yashagan ko‘p qavatli binoning to‘rtinchi qavatiga uyushtirildi. Oqibatda Hasan Rabah Labid, rafiqasi Manar va uch farzandi Muhammad, Rahaf hamda Tamim halok bo‘ldi.
Oiladagi 9 yoshli qizaloq Hala esa vayronalar ostidan yengil jarohatlar bilan qutqarib olindi.
Manbalar Tal al-Havo mahallasidagi bir xonadonga uyushtirilgan hujumda ikki falastinlik halok bo‘lganini, shuningdek Shati qochqinlar lageridagi Muhanna oilasi uyiga va Shayx Ridvon yaqinidagi Abu Amin chorrahasi atrofidagi turar joyga qilingan hujumlarda yana kamida ikki kishi hayotdan ko‘z yumganini bildirdi.
Bundan tashqari, Nosir shifoxonasi Mavasi hududiga avvalroq uyushtirilgan Isroil bombardimoni oqibatida og‘ir yaralangan bir ayol vafot etganini ma’lum qildi.
Keng ko‘lamli vayronagarchilik
Isroil bombardimonlari bilan bir vaqtda, Isroil kuchlari nazorat ostidagi shimoliy va janubiy hududlarda keng ko‘lamli buzish amaliyotlarini ham davom ettirdi.
Guvohlarning aytishicha, Isroil armiyasi janubdagi Xon Yunis shahrining sharqida kamida 10 ta bino va inshootni buzib tashlagan. Shuningdek, G‘azoning sharqiy mahallalarida yana ikki buzish amaliyoti amalga oshirilgan.
2023-yil 8-oktabrdan buyon Isroilning G‘azoga qarshi harbiy amaliyotlari natijasida, asosan ayollar va bolalardan iborat qariyb 73 ming falastinlik halok bo‘lgan, 173 mingga yaqin kishi yaralangan. Hudud infratuzilmasining taxminan 90 foizi vayron qilingan.
2025-yil 10-oktabrda e’lon qilingan sulh bitimiga qaramay, Isroil hududga gumanitar yordam kirishini cheklash va kundalik bombardimonlarni davom ettirish orqali harbiy amaliyotlarini sürdürmoqda. Sulh davrida ham, asosan ayollar va bolalardan iborat 936 falastinlik halok bo‘lgan, 2 ming 903 kishi yaralangan.
