Yevropa Kengashi, muassasa rahbari bayonotiga ko‘ra, AQSh Prezidenti Donald Trampning Grenlandiya bilan bog‘liq bojxona tarifalarini joriy etish rejalarini muhokama qilish uchun yaqin kunlarda favqulodda yig‘ilish chaqiradi.
“So‘nggi voqealarning ahamiyatini inobatga olib va muvofiqlashtirishni kuchaytirish maqsadida, Yevropa Kengashining favqulodda yig‘ilishini yaqin kunlarda o‘tkazishga qaror qildim”, — deb yozdi Antonio Kosta yakshanba kuni X ijtimoiy tarmog‘ida.
Kosta aytishicha, maslahatlashuvlardan so‘ng YeI a’zo davlatlari “birlikka, xalqaro huquqqa, hududiy yaxlitlik va milliy suverenitetga bo‘lgan kuchli sodiqlikni yana bir bor tasdiqladi”. Shuningdek, ular Daniya va Grenlandiya bilan birdamlikda ekanini, xususan NATO orqali Arktikada tinchlik va xavfsizlik borasida umumiy transatlantik manfaatlarga ega ekanini bildirdi.
Kosta a’zolar tarifalar “transatlantik munosabatlarni zaiflashtirishi va YeI–AQSh savdo kelishuvi bilan mos kelmasligi” haqidagi umumiy bahoni ham tasdiqlaganini, har qanday majburlashga qarshi o‘zlarini himoya qilishga tayyor ekanini va umumiy manfaatlar masalasida AQSh bilan konstruktiv muloqotni davom ettirish niyatida ekanini qo‘shimcha qildi.
Bu bayonot AQSh Prezidenti Donald Tramp shanba kuni Vashington 1-fevraldan boshlab Daniya, Norvegiya, Shvetsiya, Fransiya, Germaniya, Buyuk Britaniya, Niderlandiya va Finlyandiyadan keladigan mahsulotlarga 10 foizlik bojxona boji joriy etishini, iyun oyida esa bu ko‘rsatkich 25 foizga oshirilishini aytgach yangradi. Tramp, agar AQShning go‘yoki “Grenlandiyani to‘liq va butunlay sotib olish” bo‘yicha kelishuvga erishilmasa, ushbu choralar qo‘llanishini ta’kidladi.
Yevropalik yetakchilar bojxona tarifalari tahdidini rad etdi va Daniya bilan birdamliklarini yana bir bor bildirdi.
Yakshanba kuni avvalroq nomi tilga olingan sakkizta Yevropa davlati AQShning bu tahdidini qoralovchi qo‘shma bayonot e’lon qildi hamda Arktika xavfsizligi va milliy suverenitetga sodiqligini yana bir bor tasdiqladi.
