Turkiya Prezidenti Rajab Toyyib Erdo‘g‘an Isroil va Falastin qarshilik harakati Hamas o‘rtasida Sharm al-Shayxda olib borilgan muzokaralar natijasida erishilgan sulh kelishuvini mamnuniyat bilan qabul qilganini bildirdi. Ushbu muzokaralarda Turkiya ham o‘z rolini o‘ynagan.
Erdo'g’an payshanba kuni bergan bayonotida Isroil hukumatini o’t ochishni to’xtatishga rozi bo’lishga undash uchun zarur siyosiy irodani namoyon etgan AQSh prezidenti Donald Trampga minnatdorlik bildirdi. Shuningdek, Qatar va Misrga ushbu kelishuvga erishishda ko‘rsatgan muhim yordamlari uchun tashakkur izhor etdi.
Turkiya prezidenti ushbu kelishuvning amalga oshirilishini yaqindan kuzatib borishini va tinchlik jarayoniga o‘z hissasini qo‘shishda davom etishini ta’kidladi. U Anqaraning 1967 yilgi chegaralar asosida Sharqiy Quddus poytaxt bo‘lgan mustaqil va suveren Falastin davlati barpo etish borasidagi qat’iy pozitsiyasini yana bir bor tasdiqladi.
So‘nggi ikki yil davomida katta azob-uqubat va yo‘qotishlarga duch kelgan falastinliklarga birdamlik izhor etar ekan, Erdo‘g‘an ularning qiyin sharoitlarga qaramay ko‘rsatgan matonati va qadr-qimmatini olqishladi.
Trampning G‘azo uchun rejasining birinchi bosqichi bo‘yicha kelishuv imzolanishi payshanba kuni soat 09:00 GMTda amalga oshishi kutilmoqda, deb xabar berdi Reuters agentligi kelishuv tafsilotlari bilan tanish manbaga asoslanib.
Sulh kelishuvi imzolangandan so‘ng G‘azoda amalda kuchga kirishi kutilmoqda, deb qo‘shimcha qildi manba. Qatar, Misr, AQSh va Turkiya G‘azo tinchlik kelishuvining kafillari sifatida imzo chekishgan, deb xabar berdi The Jerusalem Post.
Isroil va Hamas uzoq kutilgan sulh kelishuviga erishganliklarini e’lon qilishdi. Bu Trampning Tel-Avivning G‘azodagi urushini tugatish rejasining birinchi bosqichi bo‘lib, bu urush 67,000 dan ortiq falastinliklarning hayotiga zomin bo‘lgan va Yaqin Sharqni qayta shakllantirgan.
Kelishuv uchta asosiy masalani qamrab oladi: isroillik asirlar va falastinlik mahbuslarni ozod qilish, Isroil qo‘shinlarini belgilangan chiziqqa qaytarish va yillar davomida blokada va urushdan aziyat chekkan G‘azoga zarur yordamni yetkazib berish.
