Jon Ternus Apple kompaniyasining bosh ijrochi direktori (CEO) lavozimini egalladi. U smartfon bozorida ustun mavqega ega bo‘lgan, biroq sun'iy intellekt sohasida raqobatchilaridan ortda qolayotgan ulkan imperiyani meros qilib oldi.
Mazkur rahbarlik almashinuvi Tim Kukning 15 yillik boshqaruv davriga yakun yasadi va Apple'ning ta'minot zanjirini mukammal shakllantirgan operatsiyalar bo‘yicha mutaxassisni kompaniyaning apparat ta'minotini loyihalashtirishga mas'ul bo‘lgan muhandis bilan almashtirdi.
Ellik bir yoshli Jon Ternus 2001-yilda Apple dizayn jamoasiga kelib qo‘shilgan bo‘lib, keyinchalik apparat muhandisligi bo‘yicha katta vitse-prezident lavozimiga ko‘tarildi va brendning butun mahsulotlar qatorini yaratuvchi jamoalarga rahbarlik qildi.
Dushanba kuni xodimlarga yo‘llagan maktubida Tim Kuk o‘z vorisini yuqori baholab shunday yozdi: "Dunyoni o‘zgartiradigan mahsulotlar yaratish uchun nimalar kerakligini Jon kabi kam odam tushunadi."
Ternus 9-sentabr kuni Apple kompaniyasining yillik an'anaviy taqdimotida ilk bor omma qarshisiga chiqadi. Kompaniya mazkur tadbirda o‘zining ilk bukiladigan iPhone'ini namoyish etishi kutilmoqda.
Seshanba kuni e'lon qilingan qimmatli qog‘ozlar hujjatlariga ko‘ra, Ternusning asosiy yillik maoshi 3 million dollar etib belgilangan – bu Tim Kukning ijrochi sifatidagi asosiy maoshi bilan bir xil. Shu bilan birga, aksiyalar optsionlari uning birinchi yildagi umumiy kompensatsiyasini 58 million dollargacha yetkazishi mumkin.
Tim Kuk esa kompaniya Direktorlar kengashi raisi lavozimini egallagani bois, uning yillik maoshi 2 million dollarga tushirildi va umumiy kompensatsiya qiymati 47 million dollargacha baholanmoqda.
Geosiyosiy to‘siqlar
Yangi rahbar o‘z zimmasiga murakkab geosiyosiy muammolarni ham olmoqda. Tim Kuk yillar davomida Pekin va Vashington bilan nozik munosabatlarni o‘rnatib, asosan Xitoyda joylashgan ulkan ishlab chiqarish tarmog‘ini saqlab qolishga muvaffaq bo‘lgan edi. Garchi Apple Hindiston va Vetnamga qarab diversifikatsiya qilishni boshlagan bo‘lsa-da, Xitoy ishlab chiqarish zanjirida hamon markaziy o‘rin tutmoqda.
AQSh Prezidenti Donald Tramp o‘z navbatida iPhone smartfonlarini bevosita mamlakat ichida ishlab chiqarishni bir necha bor talab qilgan. Tim Kuk ijrochi rais sifatida faol geosiyosiy mandatni saqlab qoladi va dunyo bo‘ylab yetakchi siyosatchilar hamda qaror qabul qiluvchilar bilan muloqotlarni davom ettiradi.
Taniqli tahlilchi Den Ives Ternus haqida shunday deydi: "U apparat ta'minoti borasida Apple Park'ni o‘zining hamyonidek yaxshi biladi." Biroq global siyosiy maydon uning ish jarayonida o‘rganishi va moslashishi kerak bo‘lgan eng asosiy yo‘nalishlardan biri bo‘lib qoladi.
