Rossiya bilan Ukraina kecha (17.10.2025) tunda bir - birining energetika infratuzilmasiga havo hujumlari uyushtirganlikda aybladi.
Volgograd gubernatori Andrey Bocharov Rossiya Mudofaa vazirligi ma’lumotiga tayangan holda Ukraina tomonidan janubiy mintaqadagi energetika infratuzilmasiga qarshi insonsiz havo transportlari orqali keng ko‘lamli hujum uyushtirilganini bildirdi.
Bocharovning soʻzlariga koʻra urib tushirilgan insonsiz havo transporti qoldiqlari viloyatning Novonikolayevskiy tumanidagi Balashovskaya transformator stansiyasida yongʻinga yo‘l ochgan. U o‘z so‘zida shuningdek: «Oʻt oʻchiruvchilar vaqtni qo‘ldan boy bermay yong‘inni o‘chirmoqda. Taʼmirlash xodimlari atrofdagi aholi punktlariga elektr taʼminotini tiklash ustida ishlamoqda. Turar - joy binolari ziyon ko‘rmadi va tan jarohati olganlar yoʻq», - dedi.
Voronej gubernatori Aleksandr Gusev esa qo‘shni viloyatda qayd etilgan insonsiz havo transporti hujumi ortidan viloyatidagi bir necha qishloq ham elektr ta’minotisiz qolganini ma’lum qildi ammo qo‘shimcha ma’lumot bermadi.
Mudofaa vazirligining qayd etishicha, kechasi bilan Ukrainaga oid 51 ta insonsiz havo transporti urib tushirilgan, ulardan 11 tasi Volgograd viloyati osmonida qayd etlgan.
Ayni paytda Ukrainaning milliy neft va gaz kompaniyasi Naftogaz, Telegram orqali bergan bayonotida, Rossiya o‘z ob’ektlariga qarshi keng ko‘lamli hujum uyushtirgani, ba’zi muhim ob’yektlar faoliyatini vaqtincha to‘xtatgani haqida ma’lumot bo‘lishdi.
Naftagoz: «Bunday hujumlar kompaniyaning gaz ishlab chiqarish hajmiga bevosita ta'sir qiladi va biz buning bir qismini import orqali qoplashga majburmiz», - dedi.
Ukrainaning energetika tarmog‘i operatori Ukrenergo, energiya tizimidagi og‘ir vaziyat tufayli bir qancha viloyatlarda, jumladan, poytaxt Kiyevda ham elektr ta’minotida favqulodda uzilishlar kiritilganini ma’lum qildi.
Ukrainaning xususiy energiya provayderi DTEK ham Poltava viloyatidagi gaz ishlab chiqarish inshooti faoliyatini to‘xtatganini ma’lum qildi.
Ukraina Prezidenti Vladimir Zelenskiy X platformasida mavzu haqida: «Bu yilgi kuz mavsumida ruslar har kuni bizning energetika infratuzilmamizga hujum qilmoqda”, - degan holda Rossiyaga qarshi yana -da ko‘proq harbiy va iqtisodiy bosimni kuchaytirishga chaqirdi. Zelenskiy, "Bu masala bo'yicha kuchli qarorlar qabul qilinishi mumkin va bu qarorlar Ukrainaning barcha hamkorlari bilan bog'liq. Hamkorlarimizning kuchi urushning tugashini to'g'ridan - to'g'ri belgilab beradi», - dedi.
Zelenskiy juma kuni Vashingtonda AQSh Prezidenti Donald Tramp bilan bo‘lajak uchrashuviga to‘xtalar ekan, «Hozirda Yaqin Sharqda tinchlik o‘rnatish uchun muhim imkoniyat bor. Bu Yevropada ham mumkin. Aynan shu narsani bugun va ertaga Vashingtonda aytib o‘taman», - deya gapirdi.
Ukraina Harbiy - havo kuchlari, shuningdek, havo hujumidan mudofaa qilish kuchlari bir kechada Rossiya tomonidan uchirilgan 320 ta insonsiz havo transportidan 283 tasini va turli 37 ta raketadan 5 tasini urib tushirganini iddao etdi.
Ukraina Bosh shtabi ham bir kechada Rossiyadagi Saratov neftni qayta ishlash zavodiga zarba berganini iddao etdi ammo Rossiya rasmiylari bu haqida hech qanday izoh bermadi.
