AQSh Davlat departamenti chorshanba kuni Yaqin Sharqdagi vaziyat keskinlashib borayotgan bir pallada Saudiya Arabistonining havo mudofaasini mustahkamlash maqsadida qiymati qariyb 1,96 milliard dollarga teng qurol-yarog‘ sotilishini ma'qulladi.
Departament bayonotida ta’kidlanishicha, ushbu taklif etilayotgan bitim AQShning tashqi siyosati va milliy xavfsizlik maqsadlariga xizmat qiladi, chunki u Fors ko‘rfazi mintaqasida siyosiy barqarorlik hamda iqtisodiy taraqqiyot garovi bo‘lgan NATOga a'zo bo‘lmagan yirik ittifoqchining mudofaa salohiyatini oshiradi.
Xaridning asosiy maqsadi — mintaqaviy kuchlar tomonidan qo‘llanilayotgan dronlar kabi ortib borayotgan havo tahdidlariga qarshi kurashish, qimmatbaho Patriot raketalariga bo‘lgan qaramlikni kamaytirish va ichki mudofaa tizimini kuchaytirishdir.
Saudiya Arabistoni so‘ragan qurol-yarog‘lar tarkibiga quyidagilar kiradi:
20 000 tagacha «Advanced Precision Kill Weapon Systems» (APKWS) — AQSh Dengiz kuchlari ta’rifiga ko‘ra, bu vosita yaqin masofadagi janglarda atrofdagilarga zarar yetkazilishini cheklagan holda nishonlarni yo‘q qilishning arzon usulidir.
Ishga tushirish moslamalari, yuqori portlovchi jangovar qismlar va raketa dvigatellari kabi yordamchi mudofaa uskunalari.
Mazkur loyihaning asosiy pudratchisi Nyu-Jersi shtatining Nashua shahrida joylashgan BAE Systems kompaniyasi bo‘lishi belgilangan.
Yemendagi vaziyat va Hutilar bilan to‘qnashuvlar
Ushbu qaror Hutilar tomonidan dushanba kuni Saudiya Arabistonining janubiy qismidagi Abha aeroportiga raketa hujumi uyushtirilganidan so‘ng qabul qilindi. Ayni paytda Saudiya Arabistoni Yemendagi Eron tomonidan qo‘llab-quvvatlanadigan Hutilar bilan qayta urush holatiga yaqinlashayotgandek ko‘rinadi.
Hutilarning hujumi Yaman hukumati tomonidan Sanoa aeroportiga berilgan zarbadan keyin yuz berdi. Ushbu zarba Eron oliy rahbarining dafn marosimidan qaytayotgan Hutilar delegatsiyasini olib ketayotgan samolyot yo‘nalishini o‘zgartirish maqsadida amalga oshirilgan edi. Hutilar hujum uchun Riyodni aybladi. AQSh esa Eronga qarshi bosimni kuchaytirib, mintaqada dengiz blokadasini tiklagan bir paytda tomonlar o‘rtasidagi qarama-qarshiliklar yanada keskinlashdi.
AQSh Davlat departamenti bayonotida ushbu sotuv AQShning mudofaa tayyorgarligiga salbiy ta’sir ko‘rsatmasligi qayd etilgan. Ma'lumot uchun, Saudiya Arabistoni AQSh qurol-yarog‘larining eng yirik xaridori hisoblanadi.
Kuveyt uchun yangi paket
Shu bilan birga, Vashington Kuveytga C-17 samolyotlarini qo‘llab-quvvatlash va tegishli uskunalar uchun 484 million dollarlik xorijiy harbiy savdoni ma'qulladi.
Kuveytga yetkazib beriladigan paket quyidagilarni o‘z ichiga oladi:
Samolyot komponentlari, ehtiyot qismlar va aksessuarlar.
Modifikatsiya va qo‘llab-quvvatlash uskunalari, zaxira qismlar.
Yerda xizmat ko‘rsatish va aloqa vositalari.
Dasturiy ta'minotni qo‘llab-quvvatlash, texnik hujjatlar, treninglar va logistika xizmatlari.
