Turkiya adliya vaziri Akin Gurlek Binyamin Netanyahuga nisbatan “genotsid” jinoyati yuzasidan olib borilayotgan sud jarayoni doirasida qizil byulleten chiqarish so‘ralganini ma’lum qildi.
Vazir Gurlek NSosyal tarmog‘idagi sahifasida bergan bayonotida G‘azoga insonparvarlik yordami yetkazish maqsadida yo‘lga chiqqan Global Sumud flotiliyasi faollariga xalqaro suvlarda uyushtirilgan hujum bo‘yicha sud jarayoni qat’iyat bilan davom etayotganini ta’kidladi.
Shu doirada Istanbulning 11-og‘ir jinoyatlar bo‘yicha sudi Netanyahu va Afek Moskovitch ham kiradigan 35 nafar ayblanuvchiga nisbatan sud jarayonini olib borayotganini bildirgan Gurlek shunday dedi:
“Ushbu ish doirasida Netanyahu va Afek Moskovitchga nisbatan ‘genotsid’ jinoyati bo‘yicha 2026-yil 14-iyulda chiqarilgan hibsga olish orderlari asosida Adliya vazirligimiz ularning xalqaro miqyosda qidiruvga berilishi uchun Ichki ishlar vazirligimizdan qizil byulleten chiqarishni so‘radi. Tegishli hujjatlar Tashqi ishlar vazirligimizga yuborildi”.
Gurlek Netanyahu va Moskovitch G‘azoga insonparvarlik yordami yetkazayotgan tinch aholiga xalqaro suvlarda qurolli hujum uyushtirish va faollarni ushlab turish bilan bog‘liq harakatlari sababli “insoniyatga qarshi jinoyat”, “genotsid”, “og‘irlashtiruvchi holatlarda shaxsni erkinlikdan mahrum qilish”, “qasddan tan jarohati yetkazish”, “qiynash”, “mol-mulkka zarar yetkazish”, “og‘irlashtiruvchi holatlarda talonchilik” hamda “transport vositalarini olib qochish” jinoyatlari bo‘yicha sud qilinayotganini bildirdi.
G‘azoda genotsid siyosatini yuritayotgan Netanyahu hukumatini daxlsiz va javobgarlikka tortib bo‘lmaydigan deb hisoblashni aslo qabul qilmasliklarini ta’kidlagan adliya vaziri shunday dedi:
“G‘azoda sodir etilgan jinoyatlarning yashirilishiga va aybdorlarning jazosizlik niqobi ostida himoya qilinishiga yo‘l qo‘ymaymiz. Milliy va xalqaro huquqning barcha imkoniyatlaridan qat’iyat bilan foydalanamiz”.
Turkiya 2025-yil noyabrida G‘azodagi genotsidga aloqadorligi sababli Netanyahu va boshqa bir qator gumondorlarni hibsga olish haqida order chiqargan edi.
Hibsga olish orderlari Isroilning G‘azodagi tinch aholiga qarshi “tizimli” hujumlari, genotsid harakatlari va insoniyatga qarshi jinoyatlari yuzasidan olib borilgan keng qamrovli tergovdan so‘ng chiqarilgan.
