Axios nashrining Shanba kuni tarqatgan xabariga ko‘ra, Isroil so‘nggi hujumlarda Eronning diniy rahbari Ali Xomanaiy va Prezident Mesud Pezeshkiyon kabi yuqori martabali siyosiy hamda harbiy shaxslarni nishonga olgan.
AQSHlik yuqori lavozimli mulozim, Isroilning Eronlik nufuzli qo‘mondonlar va siyosiy rahbarlarga qarshi havo zarbalari uyushtirganini mazkur nashrga tasdiqladi.
Isroilning “12-kanal” teleradiokompaniyasi, Tel-Avivdagi taxminlar Eron yadroviy dasturi uchun mas’ul va Xomanaiyning maslahatchisi bo‘lgan Ali Shamxoniyning o‘ldirilgan bo‘lishi ehtimoli yuqori ekaniga ishora qilayotganini bildirdi.
Eron Tashqi ishlar vazirligi esa ba’zi xabarlarni tezda rad etdi va Tashqi ishlar vaziri Abbos Aroqchining sog‘lig‘i yaxshi ekanini ma’lum qildi. Eron rasmiylari hozircha biron-bir o‘lim holati bo‘yicha rasmiy tasdiq bermadi.
Isroil va AQSH Shanba kuni erta tongda Eronga qarshi qo‘shma amaliyot boshlaganliklarini e’lon qilib, buni “Eron tuzumi tomonidan yaratilayotgan tahdidlar” bilan izohlagan edilar.
Ushbu hujumlar Eron yadroviy dasturi bo‘yicha Vashington va Tehron o‘rtasida Ummon vositachiligida olib borilayotgan muzokaralar davom etayotgan vaqtda yuz berdi. Jenevada o‘tkazilgan yangi bosqich so‘zlashuvlari Payshanba kuni yakuniga yetgan edi.
O‘tgan yilning iyun oyida AQSH 12 kun davom etgan Isroil-Eron urushi paytida Erondagi uchta yadroviy inshootga zarba bergan edi.
