Los-Anjeles shahri Chatsworth mahallasida seshanba kuni kechqurun vertolyot qulashi oqibatida uch kishi halok bo‘ldi, yana bir kishi shifoxonaga yotqizildi. Bu haqda Los-Anjeles Yong‘in xizmati (LAFD) ma’lum qildi.
"Voqea joyida to‘rt nafar jabrlanuvchi tekshirildi. Ulardan uchtasi voqea joyida vafot etgani aniqlandi. Bir nafar bemor og‘ir ahvolda mahalliy shifoxonaga yetkazildi", — deyiladi idora bayonotida.
Hozirda mazkur avariya yuzasidan Milliy transport xavfsizligi kengashi (NTSB) va Federal aviatsiya ma’muriyati (FAA) tomonidan surishtiruv ishlari olib borilmoqda.
Avvalroq mahalliy OAV qulagan vertolyot NBC Los Angeles (KNBC-TV) telekanaliga tegishli ekani va u yirik yo‘l-transport hodisasini yoritayotgan bo‘lgani haqida xabar tarqatgandi. Eslatib o‘tamiz, o‘sha avtobus ishtirokidagi halokatda ham kamida ikki kishi halok bo‘lgandi.
LAFD kapitani Branden Silverman jurnalistlarga bergan intervyusida halokatga uchragan vertolyot axborot agentligiga tegishli ekanini hozircha tasdiqlay olmasligini bildirdi. o‘z navbatida, Los-Anjeles politsiya boshqarmasi (LAPD) ham havo kemasi ularga tegishli emasligini tasdiqladi.
