Rossiya havo mudofaa kuchlari tunda Moskva poytaxtiga qarab uchib kelayotgan 37 ta dronni bir necha to‘lqinda urib tushirdi.
Moskva shahar hokimi Sergey Sobyaninning ma’lum qilishicha, Mudofaa vazirligi havo mudofaa tizimlari dron hujumlarini muvaffaqiyatli qaytargan. Hujumlar ketma-ket, ya’ni dastlab 10 ta, keyin 17 ta va yakunda yana 10 tadan iborat guruhlarda amalga oshirilgan. Hozirda favqulodda vaziyatlar xizmati xodimlari dron qoldiqlari tushgan hududlarda oqibatlarni bartaraf etish bilan shug‘ullanmoqda.
Hujum oqibatida yerda jabrlanganlar yoki binolarga yetkazilgan zararlar haqida rasmiy tafsilotlar hozircha ochiqlanmadi. Ukraina tomoni esa ushbu dron hujumlari bo‘yicha hech qanday rasmiy bayonot bermagan.
Mazkur hodisa Rossiya va Ukraina o‘rtasidagi urushning beshinchi yilida, har ikki tomon uzoq masofali dron hamda raketa zarbalarini kuchaytirgan, ammo front chizig‘idagi vaziyat deyarli o‘zgarmasdan qolayotgan bir paytda yuz berdi.
