O‘zdemir Go‘ktash bolalarga qaratilgan ijtimoiy tarmoqlarni tartibga solish doirasida bolalarning jismoniy, aqliy, rivojlanish, ruhiy, ijtimoiy va hissiy kamolotini himoya qiladigan raqamli ekotizimni yaratish yo‘lida muhim bosqichdan o‘tganliklarini bildirdi.
May oyida Turkiya Buyuk Millat Majlisida qonun sifatida qabul qilingan tartibga solishga oid nizom Rasmiy gazetada e’lon qilinganini ta’kidlagan Go‘ktash: “15 yoshga to‘lmagan bolalarga ijtimoiy tarmoq xizmatlari ko‘rsatilmaydi, 15–18 yosh oralig‘idagi bolalarga esa maxsus va xavfsiz xizmatlar taqdim etiladi”, - dedi.
Mazkur tartibga solish mahalliy va xorijiy barcha ijtimoiy tarmoq xizmatlari provayderlarini qamrab olishini qayd etgan Go‘ktash, asosiy maqsad bolalarni raqamli dunyo xavflaridan himoya qilish ekanini ta’kidladi. Ijtimoiy tarmoq provayderlaridan bolalarni himoya qiluvchi tizimlarni joriy etish kutilayotganini bildirgan Go‘ktash quyidagilarni ifoda etdi:
“Bu jarayonda bolaning yoshi va uning eng ustuvor manfaatlari asos qilib olinadi. Maqsadimiz bolalarning rivojlanishini himoya qilish bilan birga, ularga nisbatan zo‘ravonlik va ekspluatatsiya xavfining oldini olishdir. Shu doirada bolalarning akkauntlari hammaga ochiq bo‘la olmaydi, jonli efir va shaxsiylashtirilgan reklama funksiyalari taqdim etilmaydi. Bolalar faqat o‘zlari kuzatib boradigan akkauntlardan xabar olishlari mumkin bo‘ladi, ularning obunachilar ro‘yxatini esa boshqalar ko‘ra olmaydi. Yangi akkaunt ochishda e-Devlet orqali yosh tasdiqlanadi. Bu jarayonda shaxsni tasdiqlovchi ma’lumotlar emas, faqat yosh toifasi taqdim etiladi va shaxsiy ma’lumotlar himoya qilinadi”.
Yoshni tasdiqlash jarayonlarini yakunlash uchun oxirgi muddat — 2027-yil 31-mart
Nizom 1 - noyabrdan kuchga kirishini ma’lum qilgan Go‘ktash, ijtimoiy tarmoq xizmatlari provayderlari mavjud akkauntlar bo‘yicha yoshni tasdiqlash jarayonlarini yakunlashlari uchun oxirgi muddat 2027 - yilning 31 - marti ekanini bildirdi.
Go‘ktash ota - onalar farzandlarining akkauntlari, ulardan foydalanish vaqti hamda pulli amallarini nazorat qila olishlarini ta’kidladi. Uning aytishicha, bu orqali oilalarning farzandlari raqamli dunyoda amalga oshirayotgan faoliyatni kuzatishi va ularni internetdagi xavflardan himoya qilishi qo‘llab - quvvatlanadi
