Venesuela prezidenti Nikolas Maduro shanba kuni hukumatining AQSh tomonidan poytaxt Karakasga qarshi amalga oshirilgan “nihoyatda jiddiy harbiy hujum” deb baholagan voqealar ortidan favqulodda holat e’lon qildi.
Shahar bo‘ylab samolyot parvozini eslatadigan tovushlar bilan birga ketma-ket portlashlar eshitildi.
Maduro hukumati bayonotida: “Venesuela Amerika Qo‘shma Shtatlarining amaldagi hukumati tomonidan Venesuela hududi va xalqiga qarshi amalga oshirilgan nihoyatda jiddiy harbiy hujumni xalqaro hamjamiyat oldida rad etadi, qoralaydi va la’natlaydi”, deyiladi.
Maduro mamlakat kuchlarini safarbarlikka chaqirib, bu holatni “imperialistik hujum” deb atadi.
U shanba kungi chiqishida milliy suverenitet va jamoat tartibini saqlash maqsadida fuqarolar va armiya birgalikda vazifaga jalb etilganini, bu qadamni xalq, armiya va politsiyaning umumiy sa’y-harakati sifatida baholadi.
Hukumat Birlashgan Millatlar Tashkiloti Xavfsizlik Kengashi, BMT Bosh kotibi, Lotin Amerikasi va Karib davlatlari hamjamiyati (CELAC) hamda Qo‘shilmaslik harakatiga rasmiy shikoyat kiritishini, Karakas “hujum” deb atayotgan voqealar yuzasidan AQShning xalqaro darajada qoralanishi va javobgarlikka tortilishini talab qilishini bildirdi.
Favqulodda holat
Maduro konstitutsiya va milliy xavfsizlik to‘g‘risidagi qonunlarga muvofiq barcha milliy mudofaa rejalari ishga tushirilganini e’lon qildi hamda hukumatga favqulodda vakolatlar beruvchi, mamlakat bo‘ylab “tashqi beqarorlik” holatini joriy etadigan farmonga imzo chekdi.
Ushbu chora fuqarolarning huquqlarini himoya qilish, davlat institutlari uzluksizligini ta’minlash va zarurat tug‘ilganda Venesuelani qurolli qarshilikka tayyorlash maqsadida ko‘rilgani aytildi.
Prezident, shuningdek, Milliy Keng qamrovli Mudofaa Qo‘mondonligini zudlik bilan butun mamlakat bo‘ylab joylashtirishni buyurdi va hududiy hamda munitsipal mudofaa tuzilmalariga kechiktirmasdan safarbar bo‘lish bo‘yicha ko‘rsatma berdi.
Maduro BMT Nizomining 51-moddasiga tayangan holda Venesuelaning o‘zini himoya qilish huquqi saqlanib qolishini bildirdi va dunyo hukumatlari hamda xalqlarini birdamlikka chaqirdi; nutqini marhum prezident Ugo Chavesning birlik, kurash va g‘alaba haqidagi chaqirig‘i bilan yakunladi.
Hujumlar ortida AQSh turgani aytilmoqda
AQSh OAV xabarlariga ko‘ra, shanba kuni Karakasga qaratilgan bir qator hujumlar ortida AQSh harbiylari turgan.
Oq uy va Pentagon portlashlar hamda shahar ustida samolyotlar uchgani haqidagi xabarlar bo‘yicha hozircha izoh bermadi.
CBS News va Fox News kabi AQSh media manbalari ismi oshkor etilmagan Tramp ma’muriyati vakillari AQSh kuchlari voqealarda ishtirok etganini tasdiqlaganini bildirdi.
CBS muxbiri Jennifer Jeykobs X ijtimoiy tarmog‘ida shanba kuni erta tongda Tramp ma’muriyati vakillari Karakas ustida portlashlar va samolyotlar haqidagi xabarlardan xabardor ekanini yozdi.
Oq uy va Pentagon Reuters’ning izoh so‘rovlariga darhol javob bermadi.
Reuters’ga ismini oshkor etmagan AQSh rasmiysi AQSh kuchlari Venesuela ichida hujumlar uyushtirganini aytdi, biroq hujumlar tafsilotlarini ochiqlamadi.
