Yevropa komissiyasi prezidenti Ursula fon der Leyen chorshanba kuni bolalarning ijtimoiy tarmoqlarga kirishini cheklash rejasini e'lon qildi. U Yevropa Ittifoqi bolalarni onlayn muhitdagi zararli ta'sirlardan himoya qilishga qaratilgan yangi "Kids Act" (Bolalar to'g'risidagi qonun) loyihasini taqdim etishini bildirdi.
Yevropa parlamentida so'zga chiqqan fon der Leyen komissiya payshanba kuni mazkur qonunni muhokamaga kiritishini aytib, bolalarning yoshiga qarab tabaqalashtirilgan himoya choralari joriy etilishini ma'lum qildi.
"13 yoshgacha bo'lgan bolalarga ijtimoiy tarmoqlardan foydalanishga ruxsat berilmaydi. 15 yoshgacha esa shaxsiy akkaunt ochish taqiqlanadi," dedi u.
Taklif etilayotgan yondashuvga ko'ra, 13 dan 15 yoshgacha bo'lgan o'smirlar faqat ota-onalari yoki vasiylari tomonidan ochilgan va nazorat qilinadigan cheklangan "mini akkaunt"lardan foydalanishlari mumkin bo'ladi. Bunday akkauntlarning funksiyalari cheklangan bo'lib, kunlik foydalanish vaqti bir soatdan oshmasligi lozim.
15 dan 18 yoshgacha bo'lganlar uchun esa ijtimoiy tarmoqlar "xavfsiz dizayn" choralarini majburiy ravishda joriy etishi talab qilinadi, dedi u.
Qaramlik keltirib chiqaruvchi raqamli dizayn
Fon der Leyen ushbu tashabbus ijtimoiy tarmoqlar va qaramlik uyg'otuvchi raqamli dizaynning bolalar ruhiyatiga ko'rsatayotgan salbiy ta'siri haqidagi xavotirlardan kelib chiqqanini ta'kidladi. U buning ortidan uyqu buzilishi, xavotir (bezovtalik), kamsitish (tahqirlash) va o'ziga zarar yetkazish kabi og'ir oqibatlar kelib chiqishini qayd etdi.
U shuningdek, Yevropa Ittifoqi mas'uliyatni texnologiya platformalarining o'ziga yuklashni maqsad qilganini aytdi:
"Biz isbotlash majburiyatini o'zgartiryapmiz. Endi platformalar o'zlarining xavfsiz ekanini bizga isbotlashi shart," dedi fon der Leyen va qo'shimcha qildi: "Gap faqat voyaga yetmaganlarning ijtimoiy tarmoqlarga kirishida emas, balki platformalarning bolalarga qanday sharoitda ta'sir o'tkazishidadir."
"Yevropa harakat qilish qudratiga ega. Qoidalarni biz belgilaymiz, texnologiya emas," dedi u.
Fon der Leyenning ta'kidlashicha, YIning yondashuvi faqat voyaga yetmaganlar bilan cheklanib qolmaydi, chunki qaramlik keltirib chiqaruvchi raqamli dizayn kattalarga ham salbiy ta'sir ko'rsatmoqda. U Yevropa komissiyasi kuz oylarida yanada kengroq qamrovli "Raqamli adolat akti"ni taklif qilishni rejalashtirayotganini ma'lum qildi.
