Yarim rasmiy Mehr axborot agentligining xabar berishicha, dushanba kuni Eron armiyasi mamlakat janubidagi Bandar Abbos shahri uzra AQSh dronini urib tushirganini da’vo qildi.
Mehr agentligining armiya bayonotiga tayanib yozishicha, Eron janubi-sharqiy havo mudofaa kuchlari Bandar Abbos tumani, Hojiobod yaqinidagi osmonda "dushmanga tegishli uchuvchisiz uchish apparatini" aniqlab, to‘sib qo‘ygan va yo‘q qilgan. Armiya ushbu operatsiya havo mudofaa bo‘linmalari "dushman hujumlariga javob qaytarish va mamlakat havo makonini himoya qilish" chog‘ida amalga oshirilganini bildirdi.
Mazkur hodisa AQSh Eron bo‘ylab harbiy va infratuzilma obyektlariga, jumladan, Busher, Xuziston va Hormozgon viloyatlaridagi joylar hamda Tehron va Mashhadni bog‘lovchi temiryo‘l infratuzilmasiga yangi zarbalar berganidan bir necha soat o‘tib yuz berdi. Tehron esa o‘z navbatida Bahrayn, Quvayt va Qatardagi AQSh harbiy obyektlariga raketa va dron hujumlari uyushtirilganini e’lon qilib, Vashingtonni Pokiston vositachiligida 17-iyunda erishilgan memorandum shartlarini buzishda aybladi.
Tehron qo‘shni davlatlarni "hujum nuqtasi" bo‘lishdan ogohlantirdi
Eron Tashqi ishlar vazirligi ilgariroq bergan bayonotida qo‘shni davlatlarni o‘z hududlari yoki obyektlaridan AQSh yoki boshqa tomonlarning Eronga qarshi hujumlari uchun foydalanilishiga yo‘l qo‘ymaslikka chaqirdi. Vazirlik qo‘shni mamlakatlar xalqaro qonunlarga muvofiq o‘z hududlaridan Eronga qarshi harbiy maqsadlarda foydalanilishining oldini olish majburiyatiga egaligini ta’kidlab, har qanday hujumning "kelib chiqish va uchirilish nuqtasi" Eron qurolli kuchlari tomonidan nishonga olinishi haqida ogohlantirdi.
Mazkur voqealar AQSh harbiylari Eronga qarshi yangi zarbalar berilganini ma’lum qilganidan bir necha soat o‘tib sodir bo‘ldi. Amerika tomoni ushbu operatsiya Hormuz bo‘g‘ozidagi tijorat kemalarini nishonga olish qobiliyatini zaiflashtirish maqsadida o‘tkazilganini bildirdi.
Eron TIV so‘nggi 22 soat ichida amalga oshirilgan AQSh zarbalarini keskin qoralab, ularni BMT Ustavining jiddiy buzilishi deb atadi. Vazirlik Vashingtonni 25 kun avval imzolangan anglashuv memorandumining deyarli barcha bandlarini buzganlikda hamda transport infratuzilmasi, baliq ovlash kemalari, yuk kemalari va meteorologik obyektlarni nishonga olgan holda "urush jinoyatlari" sodir etayotganlikda aybladi. Shuningdek, vazirlik AQShni Hormuz bo‘g‘ozi qoidalarini buzishda ayblab, bu harakatlar strategik suv yo‘lida xavfsizlikka tahdid solayotganini va xalqaro tijorat yuk tashishiga xalaqit berayotganini qayd etdi.
