Turkiya Statistika instituti — Türkiye İstatistik Kurumu (TUİK) joriy yilning yanvar–mart oylariga oid turizm statistikasini e’lon qildi.
Shunga ko‘ra, turizm daromadi mazkur davrda o‘tgan yilning shu choragiga nisbatan 4,2 foizga o‘sib, 9 milliard 896 million 456 ming dollarga yetdi. Ushbu daromad tarkibida tashrif buyuruvchilardan olingan turizm daromadi 9 milliard 694 million 574 ming dollarni, tranzit yo‘lovchilardan olingan daromad esa 201 million 883 ming dollarni tashkil etdi.
Turizm daromadining 25,6 foizi mamlakatga tashrif buyurgan xorijda yashovchi fuqarolar hissasiga to‘g‘ri keldi.
Tashrif buyuruvchilar safarlarini shaxsiy tarzda yoki paket tur orqali tashkil qildi. Ushbu chorakda amalga oshirilgan xarajatlarning 8 milliard 469 million 691 ming dollari shaxsiy xarajatlar, 1 milliard 224 million 883 ming dollari esa paket tur xarajatlari bo‘ldi.
Mazkur davrda tashrif buyuruvchilarning bir kechalik o‘rtacha xarajati 102 dollarni tashkil etdi. Xorijda yashovchi fuqarolarning esa bir kechalik o‘rtacha xarajati 72 dollar bo‘lgani kuzatildi.
Tashrif buyuruvchilar Turkiyaga asosan 55,3 foiz bilan “sayohat, hordiq, sport va madaniy faoliyatlar” maqsadida kelgan. Ikkinchi o‘rinda 26,8 foiz bilan “qarindosh va do‘stlarni ziyorat qilish”, uchinchi o‘rinda esa 8,2 foiz bilan “xarid” joy oldi.
Shu davrda xorijga safar qilgan fuqarolar soni yillik hisobda 13,1 foizga oshib, 2 million 936 ming 279 nafarga yetdi. Bir kishiga to‘g‘ri keladigan o‘rtacha xarajat esa 758 dollarni tashkil etdi.
