Rossiya inson huquqlari bo‘yicha vakili Tatyana Moskalkova Telegram orqali qilgan bayonotida, to‘rt oydan ortiq vaqt davomida birorta ham asirlar almashinuvi amalga oshmaganini ma’lum qildi.
Moskalkovaning aytishicha, Ukraina Oliy Radasi (Verxovna Rada) ombudsmani Dmitro Lubinets bilan bo‘lib o‘tgan uchrashuvda, to‘rt oydan beri almashinuv bo‘lmagani sababli, asirlar almashinuvi yo‘lidagi to‘siqlarni prinsipal jihatdan zudlik bilan bartaraf etish masalasi ko‘tarilgan.
Moskalkova uchrashuv qayerda va qachon bo‘lib o‘tganiga aniqlik kiritmadi. Biroq, ham Moskalkova, ham Lubinets juma kuni Telegram kanallarida Jenevada bo‘lganliklarini va Xalqaro Qizil Xoch Qo‘mitasi prezidenti Miryana Spolyarich tashkilot bosh qarorgohida har ikki vakil bilan alohida-alohida uchrashuvlar o‘tkazganini ma’lum qilishdi.
Moskalkovaning ta’kidlashicha, Rossiya Mudofaa vazirligi “almashinuv jarayoni uchun bir necha bor turli formatlarni taklif qilgan, biroq Ukraina tomoni tegishli qarorlar qabul qilinishini kechiktirmoqda”.
“Onalar va turmush o‘rtoqlar seviklilarini xavotir bilan kutmoqda. Ularning imkon qadar tezroq uyga qaytishi insonparvarlik va rahm-shafqat namoyoni bo‘lardi”, — dedi ombudsman. U, shuningdek, yaqin vaqt ichida almashinuv doirasida ozod qilinishi mumkin bo‘lgan, Rossiyada saqlanayotgan ukrainalik harbiylar ro‘yxatini ukrainalik hamkasbiga topshirganini qo‘shimcha qildi.
Moskalkova “Ukraina tomonining takliflarini kutyapmiz”, deya ta’kidladi va Jeneva konvensiyasiga muvofiq, yarador rossiyalik asirlar ham vataniga qaytarilishi lozimligini bildirdi.
Har ikki tomondan 185 nafardan shaxs qaytarilgan so‘nggi asirlar almashinuvi oktyabr oyida bo‘lib o‘tgan edi. Asirlar almashinuviga oid dastlabki kelishuvlarga Istanbulda o‘tkazilgan Rossiya–Ukraina muzokaralari chog‘ida erishilgan.
Tomonlar o‘rtasida o‘tkazilgan uch raund muzokaralar yakunida “1 000 ga 1 000” formatidagi almashinuv, yana bir yirik ko‘lamli almashinuv rejasi, halok bo‘lgan askarlarning jasadlarini o‘zaro topshirish hamda har ikki tomondan kamida 1 200 nafar asirni qaytarishni nazarda tutuvchi kelishuvlar imzolangan edi.
