Yevropa tiklanish va taraqqiyot banki (YTTB) Turkiyaning Qayta tiklanuvchi energiyani jadallashtirish va toza energiyaga o‘tish platformasi (REACT) doirasidagi loyihalarga kelgusi besh yil ichida 6 milliard dollar sarmoya kiritishni rejalashtirayotganini ma’lum qildi.
Mazkur platforma Antaliyada bo‘lib o‘tgan BMTning COP31 iqlim konferensiyasi doirasidagi maxsus tadbirda ishga tushirildi. YTTB Turkiya Energetika va tabiiy resurslar vazirligi bilan birgalikda tashabbusni shakllantirishga hissa qo‘shganidan so‘ng, platformaning ilk ishtirokchilaridan biriga aylandi.
REACT platformasi COP31 ning “35 ga 35 Global elektrlashtirish majburiyati” (35-by-35 Global Electrification Pledge) bilan hamohang tarzda qayta tiklanuvchi energiya ishlab chiqarish, tarmoq infratuzilmasi, energiya saqlash, moslashuvchanlik yechimlari, ishlab chiqarish va elektrlashtirish sohalarida 2040-yilgacha 300 milliard dollarlik mablag‘ni jalb qilishni maqsad qilgan.
Tashabbus Turkiyaning 2040-yilga borib 175 gigavattlik quyosh va shamol energiyasi o‘rnatilgan quvvatiga erishish maqsadini qo‘llab-quvvatlaydi. Platforma amalga oshirish va moliyalashtirish jarayonlarini muvofiqlashtirish maqsadida davlat idoralari, taraqqiyot hamkorlari, moliya institutlari, investorlar va xususiy sektorni birlashtiradi.
YTTB prezidenti Odil Reno-Basso bank Turkiyaning energetika sohasidagi tajribasidan foydalangan holda, investitsiya va ekspertlik ko‘magi orqali ushbu o‘tish jarayoniga hissa qo‘shishini ta’kidladi.
“Turkiya energiya o‘tishi uchun ulkan maqsadlarni belgilab oldi”, dedi Reno-Basso. Turkiyaning ushbu maqsadlarni investitsiya va amaliy harakatlarga aylantirish borasidagi qat’iyatini olqishlashini bildirgan YTTB rahbari turkiyalik hamkorlar bilan olib borilayotgan hamkorlikka hamda bankning Turkiyaning “Sanoatni karbonsizlantirish investitsiya platformasi”dagi tajribasiga e’tibor qaratdi.
Tashabbusni qo‘llab-quvvatlayotgan boshqa tashkilotlar qatorida Yevropa Ittifoqi, Jahon banki, Xalqaro moliya korporatsiyasi (IFC), Net-nol uchun Glazgo moliyaviy alyansi (GFANZ), Iqlim investitsiya jamg‘armalari, Germaniyaning KfW taraqqiyot banki va BMTning Sanoatni rivojlantirish tashkiloti (UNIDO) bor.
Turkiyadagi eng yirik institutsional investorlardan biri bo‘lgan YTTB bugungi kunga qadar mamlakatda, asosan xususiy sektorda, 28,8 milliard dollardan ortiq sarmoya kiritgan.
