Prezident Rejep Tayyip Erdo’g‘an payshanba kuni Turkiya o‘z xavfsizligi uchun chegaralaridan tashqarida ham barcha zarur choralarni ko‘rayotganini, tahdidlarni manbasida bartaraf etayotganini va buning uchun hech kimdan ruxsat so‘ramasligini ma’lum qildi. Erdo’g‘an poytaxt Anqaradagi Chankaya ko‘shkida shahid oilalari uchun tashkil etilgan iftorlik dasturida so‘zga chiqib, "terrorizmdan xoli Turkiya" yo‘lidagi sa’y-harakatlarda katta natijalarga erishilganini bildirdi.

Prezident: "Bugungi kunda Turkiya o‘z xavfsizligini ta’minlash maqsadida nafaqat mamlakat ichkarisida, balki chegaralaridan tashqarida ham har qanday choralarni ko‘rmoqda. Qayerda biror tahdid yoki xavf mavjud bo‘lsa, hech kimdan ruxsat kutmasdan uni o‘z manbasidayoq yo‘q qilmoqdamiz", – dedi. Shuningdek, Erdo’g‘an: "Terrorizmdan xoli Turkiya yo‘nalishidagi ishlarda sezilarli masofa bosib o‘tildi. Mamlakatimiz ichida va tashqarisidagi xavfsizlikka oid tahdidlar sezilarli darajada kamaydi", – deb qo‘shimcha qildi.

Erdo’g‘an mudofaa sanoati sohasida mamlakat ilgari qariyb 80 foizga xorijga qaram bo‘lgani, bugungi kunda esa mahalliylashtirish darajasi taxminan 80 foizga yetkazilganini ta’kidladi. "Bugun uchuvchisiz uchish apparatlari (UUA), raketalar, kemalar, vertolyotlar va tanklar kabi deyarli barcha sohalarda o‘z ehtiyojlarimizni o‘zimiz qoplamoqdamiz. Inshoolloh, ertaga navbat qiruvchi samolyotlar va aviatsiyatashuvchi kemalarga keladi", – dedi u.

Qo‘shni Suriyadagi ijobiy o‘zgarishlarga to‘xtalar ekan, Prezident shunday dedi: "O‘tgan oyda Suriya shimolidagi muammoni qon to‘kilmasdan hal qilish bo‘yicha kelishuvga erishildi. To‘liq integratsiyalashuv sari jarayon boshlandi".