AQSh Mudofaa vazirligi bosh nazoratchisi Qo‘shma Shtatlar Eronga qarshi olib borgan qimmatbaho harbiy kampaniyasi natijasida o‘q-dorilar zaxirasida jiddiy yetishmovchiliklarga duch kelayotganini ma’lum qildi.
Kongressga taqdim etilgan ilk majburiy hisobotda Pentagon nazoratchisi 28-fevraldan 30-iyungacha “Epic Fury” operatsiyasi (OEF) uchun taxminan 33,4 milliard dollar sarflangani, shundan 22,3 milliard dollari faqat ishlatilgan o‘q-dorilarga to‘g‘ri kelganini қайд etdi.
Hisobotda: "OEFdagi o‘q-dorilar sarfi strategik inventar yetishmovchiliklariga olib keldi va o‘q-dorilarni qayta ta’minlash borasida sanoat bazasida muammolarni yuzaga chiqardi", deb ta’kidlangan.
Nazoratchi kampaniya davomida AQSh qurolli kuchlari sezilarli texnika yo‘qotishlariga uchraganini sanab o‘tdi: to‘rtta F-15 qiruvchi samolyoti yo‘q qilingan, bitta F-35 yashirin (stealth) samolyoti shikastlangan, yettita KC-135 yoqilg‘i quyish tankeri zarar ko‘rgan va 30 tagacha MQ-9 Reaper droni urib tushirilgan.
Flot va texnika yo‘qotishlari
AQSh prezidenti Donald Tramp qurol zaxiralari kamayishi haqidagi xavotirlarni e’tiborsiz qoldirdi. Dushanba kuni o‘zining Truth Social platformasida yozar ekan, Tramp Amerika zavodlari “tariximizdagi istalgan davrga nisbatan yanada zamonaviy va mukammal qurollarni” ko‘proq ishlab chiqarayotganini ta’kidladi.
Biroq hisobotlar uzoq masofaga uchuvchi aniq boshqariladigan raketalar va havo mudofaa tizimlari tutib beruvchi raketalari (interceptor) bo‘yicha keskin yetishmovchiliklar Eronga qarshi harbiy rejalashtirishni cheklayotganini ko‘rsatdi. Jumladan, AQSh kuchlari THAAD raketasiga qarshi mudofaa tizimlari zaxiralarining deyarli 80 foizini sarflab yuborgan.
Nizo boshlangan dastlabki 24 soat ichida AQSh Markaziy qo‘mondonligi (CENTCOM) 1 000 dan ortiq obyektga zarba bergan — biroq bunday miqyosdagi bombardimon keyingi oylar davomida takrorlanmadi.
Nazoratchi, shuningdek, Eron zarbalari Kuvayt, Bahrayn, Qatar, Birlashgan Arab Amirliklari, Saudiya Arabistoni, Iroq, Ummon va Iordaniyadagi AQSh bazalarida yuzlab inshootlarni shikastlagan yoki vayron qilganini qo‘shimcha qildi.
Mazkur inshootlarni tiklash xarajatlari asosiy byudjetdan chiqarib tashlangan bo‘lib, rasmiylar shikastlangan obyektlar qayta tiklanishi va buni kim moliyalashtirishi masalasini muhokama qilmoqda.
