Suriya saylov komissiyasi mamlakat Xalq Majlisi (parlamenti) aʼzoligiga shimoliy va shimoli-sharqiy viloyatlarning qator tumanlaridan saylangan nomzodlar roʻyxati hamda ovoz berish natijalarini eʼlon qildi.
Parlament saylovlari boʻyicha Oliy qoʻmita matbuot kotibi Navar Najmeh yakshanba kuni SANA axborot agentligiga bergan bayonotida Ayn al-Arab (Halab) okrugidan Farhod Anvar Shahin va Shavax Ibrohim al-Assaf deputatlikka saylanganini maʼlum qildi. Shuningdek, Hasakada Ibrohim Mustafo al-Ali, Omar Iso Hayes va Fasla Xader Yusuf, Qamishlida esa Kim Husayn Ibrohim, Radvon Usmon Eiso, Abdul Halim Xader al-Ali hamda Mahmud Madi al-Ali gʻalaba qozonib, parlamentdan oʻrin oldi.
SANA agentligining qayd etishicha, Hasakaning al-Malikiyah tumaniga ajratilgan mandatlar uchun atigi ikki nafar nomzod roʻyxatdan oʻtgani sababli ular saylovda raqobsiz gʻolib deb topilgan.
Najmehning soʻzlariga koʻra, saylovchilar faolligi Hasakada 92 foizni, Ayn al-Arabda 95 foizni va Qamishlida 75 foizni tashkil etgan. Matbuot kotibi oʻtkazilgan saylovlarni muvaffaqiyatli deb eʼlon qildi.
“Hasaka aholisining ovozi butun Suriya xalqi va dunyo hamjamiyati oldida baland yangradi, ular oʻzlarining ijtimoiy-siyosiy salohiyatlarini namoyish eta oldilar. Bu muvaffaqiyatli saylov yangi Suriya qiyofasini shakllantirishda muhim burilish nuqtasi boʻldi. U aholining yagona va qudratli milliy maydonning faol qismiga aylanish istagini yaqqol koʻrsatdi”, — dedi u.
Avvalroq rasmiylar Ayn al-Arabda 100 kishidan iborat saylov kollegiyasidagi 2 ta oʻrin uchun 12 nafar, Hasakada 150 nafar saylovchi ishtirokida 3 ta oʻrin uchun 13 nafar, Qamishlida esa 198 aʼzoli saylov kollegiyasida 4 ta oʻrin uchun 7 nafar nomzod kurash olib borganini maʼlum qilgan edi.
Rejim qulaganidan keyingi ilk saylovlar
Suriyada 2024-yil oxirida Bashar al-Assad rejimi agʻdarilganidan keyingi dastlabki parlament saylovlari 2025-yilning oktabr oyida oʻtkazilgan edi. Oʻshanda mamlakat saylov komissiyasi xavfsizlik muammolari sababli Suvayda, Raqqa va Hasaka viloyatlaridagi ovoz berish jarayonlarini kechiktirishga majbur boʻlgandi. Joriy yilning mart oyida esa Raqqa viloyatida ham saylovlar muvaffaqiyatli yakunlanib, 90 foizdan yuqori davomat qayd etilgan holda toʻrtta nomzod parlament aʼzoligiga saylandi.
Maʼlumot oʻrnida, 210 nafar deputatdan iborat Xalq Majlisining vakolat muddati 30 oyni tashkil etadi. Ushbu muddat toʻrt yillik oʻtish davri doirasida yangilab borilishi, zarurat tugʻilganda yana bir yilga uzaytirilishi mumkin. Parlament qonun loyihalarini taklif qilish va qabul qilish, amaldagi qonunlarga oʻzgartirish hamda qoʻshimchalar kiritish yoki ularni bekor qilish, xalqaro shartnomalarni ratifikatsiya qilish, davlat budjetini tasdiqlash hamda amnistiya eʼlon qilish kabi keng vakolatlarga ega.
