Adliya tizimiga qarashli "Mizan Online" internet nashrining xabar berishicha, Muhammad Masum-shohiy va Homid Validiyga nisbatan chiqarilgan o'lim jazosi bugun tong saharda ijro etilgan. Xabarda aytilishicha, har ikki shaxs ham "Isroilning Mossad ayg'oqchilik tarmog'iga a'zo bo'lgan". Biroq ularning aynan qachon hibsga olingani to'g'risida aniq ma'lumot berilmagan.
Mahkumlar "muhoraba" va dushman bilan hamkorlikda aybdor deb topilgan
"Mizan" nashriga ko'ra, bu shaxslar "muhoraba" (Allohga qarshi urush ochish) hamda "dushman guruhlar va sionistik rejim bilan hamkorlik qilish" kabi og'ir jinoyatlarda aybdor deb topilgan.
Eron joriy yilning 28-fevralida AQSH va Isroil bilan qurolli to'qnashuvlar boshlanganidan beri ko'plab qatl harakatlarini amalga oshirdi. Mintaqada 8-apreldan buyon Pokiston vositachiligida e'lon qilingan va omonatgina turgan ikki haftalik otashkesim tartibi amalda bo'lib turibdi. Xalqaro inson huquqlari tashkilotlarining qayd etishicha, Eron o'lim jazosini ijro etish bo'yicha dunyoda Xitoydan keyin ikkinchi o'rinni egallab kelmoqda.
