Tramp Netanyaxuni tanqid qildi: Isroil Livandagi harbiy harakatlarda mas’uliyatliroq bo‘lishi kerak.

AQSh Prezidenti Donald Tramp Vashington va Tehron o‘rtasidagi urushni yakunlashga qaratilgan tinchlik muzokaralari fonida Isroil Bosh vaziri Binyamin Netanyaxuning harakatlarini keskin tanqid qildi.

Fransiyada bo‘lib o‘tayotgan G7 sammiti doirasida jurnalistlarga bergan intervyusida Tramp Isroilning Livandagi harbiy amaliyotlariga to‘xtalib, shunday dedi: "Har safar biror kishini qidirayotganingizda butun bir ko‘p qavatli uyni vayron qilishingiz shart emas. Chunki o‘sha binolarda juda ko‘p odam yashaydi va ularning barchasi ham "Hizbulloh" a’zosi emas".

Prezident Tramp o‘z nutqi davomida Isroilga ko‘rsatgan yordamlarini eslatib, Netanyaxuning qarorlariga nisbatan keskin ifodalarni ishlatdi. "Men bo‘lmaganimda Isroil ham bo‘lmas edi, chunki boshqa hech bir prezident men qilgan ishlarni amalga oshirishga tayyor bo‘lmagan", – deya ta’kidladi u.

Siyosiy kuzatuvchilarning qayd etishicha, Netanyaxuning uzoq yillik rahbarligi davrida u to‘rt nafar AQSh prezidenti bilan ishlagan va ularning har biri bilan turli xil kelishmovchiliklarga borgan. Biroq, Trampning ochiqchasiga va bunday keskin ohangda tanqid qilishi misli ko‘rilmagan holat bo‘ldi.

Ushbu keskinlik Tramp Vashington va Tehron o‘rtasidagi urushni yakunlash uchun diplomatik sa’y-harakatlarni kuchaytirayotgan bir pallaga to‘g‘ri keldi. AQSh ichki siyosatida urushning aholi orasida qo‘llab-quvvatlanmasligi, shuningdek, yoqilg‘i narxining keskin oshishi Trampni tinchlik kelishuviga erishishga undamoqda. Biroq Livandagi so‘nggi hujumlar ushbu muzokaralar jarayoniga jiddiy xavf solmoqda.

Tramp Bibi (Netanyaxu) bilan avval yaxshi munosabatda bo‘lganini ta’kidlasa-da, Isroil Bosh vazirini Livan masalasida “ko‘proq mas’uliyatli bo‘lishga” chaqirdi.

Eslatib o‘tamiz, AQSh va Eron o‘rtasidagi tinchlik shartnomasi joriy hafta juma kuni Jenevada imzolanishi rejalashtirilgan.