Anqarada boʻlib oʻtgan Vazirlar Mahkamasi yigʻilishidan soʻng soʻzga chiqqan Rajab Toyyib Erdoʻgʻan Gʻazo, Livan, Yaman va Sudanda chegaralarni “qon va koʻz yoshlar evaziga qayta chizish”ga urinishlar kuzatilayotganini taʼkidladi.

“Mintaqamizda chegaralar yana qon va koʻz yoshlar bilan qayta chizilishiga urinilayotganini koʻrib turibmiz. Gʻazodan Livangacha, Yamandan Sudangacha — qayerga qaramaylik, bir xil ssenariy amalga oshirilayotganiga guvoh boʻlyapmiz. Turkiya bu geosiyosiy oʻyinlarni barbod qilishga intilmoqda, shu bilan birga, soʻnggi 23 yil ichida qoʻlga kiritilgan yutuqlarni yanada mustahkamlash uchun kurashmoqda”, — dedi Turkiya rahbari.

Prezident mamlakat mudofaa sanoatida ulkan muvaffaqiyatlarga erishganini qayd etib, mintaqaviy va global miqyosdagi tub burilishlar davrida ham Turkiya oʻzining uzoq muddatli strategik maqsadlariga sodiq qolayotganini eslatib oʻtdi.

Erdoʻgʻanning aytishicha, hukumat va hukmron ittifoq tarixiy oʻzgarishlar yuz berayotgan hozirgi pallada oʻz zimmasiga qanchalik ulkan masʼuliyat olganini yaxshi anglaydi. Shu bois, mamlakatning qimmatli vaqtini besamar bahs-munozaralar va ichki ziddiyatlarga sarflashga aslo haqqi yoʻq.

Prezident, shuningdek, Istanbul hamisha turk va musulmon shahri boʻlib qolishini taʼkidlar ekan, xalqni milliy birlik va birdamlikka chaqirdi.

“Bir boʻlamiz, yirik boʻlamiz, tirik boʻlamiz, birodar boʻlamiz va barchamiz birgalikda Turkiya boʻlib yoʻlimizda davom etamiz”, — deya xulosa qildi Erdoʻgʻan.