Vashingtondagi media-gala tadbiriga hujum: Dunyo yetakchilari munosabati

Dunyo yetakchilari shanba oqshomida Vashingtonda AQSh prezidenti Donald Tramp ishtirok etgan nufuzli media-gala tadbiriga uyushtirilgan hujumdan hayratda ekanliklarini bildirib, qurbonlar bo‘lmagani uchun xotirjamlik izhor etdilar.

AQSh huquq-tartibot idoralari ma’lumotiga ko‘ra, qo‘lga olingan yagona gumonlanuvchidan “shotgun” (ov miltig‘i), to‘pponcha va bir nechta pichoq musodara qilingan. U dushanba kuni federal sudda rasmiy ayblovlar bilan yuzma-yuz keladi.

Quyida xalqaro yetakchilarning ushbu voqea yuzasidan bildirilgan munosabatlari keltirilgan:

• Rejep Tayyip Erdo’g‘an: Turkiya prezidenti "Oq uy muxbirlari kechasi"da (White House Correspondents’ Dinner) yuz bergan otishma urinishini keskin qoraladi va demokratiyada zo‘ravonlikka o‘rin yo‘qligini ta’kidladi. U hech kim jarohat olmagani, xususan, AQSh prezidenti Donald Tramp va birinchi xonim Melaniya Tramp xavfsiz ekanidan mamnunligini bildirdi.

• Kir Starmer: Buyuk Britaniya Bosh vaziri Vashingtondagi manzaralardan larzaga tushganini aytdi: “Demokratik institutlarga yoki matbuot erkinligiga qilingan har qanday hujum eng keskin so‘zlar bilan qoralanishi lozim”, — deb yozdi u yakshanba kuni o‘zining X sahifasida.

• Shahboz Sharif: Pokiston Bosh vaziri hodisadan chuqur xavotir bildirdi: “Prezident Tramp, birinchi xonim va boshqa ishtirokchilarning omon qolganidan xursandman. Duolarimiz ular bilan; xavfsizlik va barqarorlik tilayman”.

• Emmanuel Makron: Fransiya prezidenti bu hodisani “qabul qilib bo‘lmas” deb atadi. “Zo‘ravonlik demokratiyada o‘rin topmaydi”, — deya ta’kidladi u va Donald Trampni to‘liq qo‘llab-quvvatlashini bildirdi.

• Narendra Modi: Hindiston Bosh vaziri prezident, birinchi xonim va vitse-prezidentning salomatligidan xotirjamligini aytdi. Uning so‘zlariga ko‘ra, bunday holatlar mutlaq qoralanishi shart.

• Mark Karni: Kanada Bosh vaziri: “Siyosiy zo‘ravonlik hech qaysi demokratik jamiyatda o‘rin topmaydi. Ushbu bezovta qiluvchi hodisadan jabr ko‘rgan barcha insonlarni o‘ylayapman”, — deb yozdi.

• Klaudiya Sheynbaum: Meksika prezidenti: “Prezident Tramp va uning rafiqasi xavfsiz ekanidan xursandmiz. Zo‘ravonlik hech qachon yechim bo‘la olmaydi”, — deya qo‘shimcha qildi.

• Pedro Sanches: Ispaniya Bosh vaziri: “Zo‘ravonlik hech qachon yo‘l emas. Insoniyat faqat demokratiya, hamjihatlik va tinchlik orqali taraqqiy etadi”, — deb ta’kidladi.

• Viktor Orban: Vengriyaning ketayotgan Bosh vaziri: “Siyosatda zo‘ravonlikka o‘rin yo‘q”, — deya qisqa va qat’iy munosabat bildirdi.

• Kaya Kallas: Yevropa Ittifoqining tashqi siyosat bo‘yicha rahbari erkin matbuotni sharaflashga qaratilgan tadbir qo‘rquv maydoniga aylanmasligi kerakligini aytib, siyosiy zo‘ravonlikni qoraladi.