Turkiya Respublikasi Tashqi ishlar vaziri Hakan Fidan Turkiya va Janubiy Koreya yadroviy energetika, transport, mudofaa sanoati hamda ilg‘or texnologiyalar kabi strategik sohalarda amalga oshirilishi mumkin bo‘lgan qo‘shma tashabbuslarni muhokama qilganini ma’lum qildi.

Tashqi ishlar vaziri Hakan Fidan Seuldagi uchrashuvlardan so‘ng Turkiya va Janubiy Koreya turli sohalarda ikki tomonlama hamkorlikni chuqurlashtirishga bo‘lgan sadoqatini yana bir bor tasdiqlaganini bildirdi.

Payshanba kuni X platformasida qilgan bayonotida Fidan: “Savdo aloqalarimizni rivojlantirish va o‘zaro investitsiyalarni ko‘paytirish borasidagi umumiy irodamizni tasdiqladik”, dedi.

Vazir Fidan ikki tomon, shuningdek, yadroviy energetika, transport, mudofaa sanoati va ilg‘or texnologiyalar kabi strategik sohalarda amalga oshirilishi mumkin bo‘lgan qo‘shma tashabbuslarni muhokama qilganini qayd etdi.

Uning aytishicha, uchrashuvlarda Osiyo-Tinch okeani mintaqasi va Yaqin Sharqdagi voqealar boshchiligida dolzarb mintaqaviy va global masalalar yuzasidan ham atroflicha fikr almashildi.

Fidan ikki mamlakatning Birlashgan Millatlar Tashkiloti, MIKTA (Meksika, Indoneziya, Janubiy Koreya, Turkiya va Avstraliya o‘rtasidagi norasmiy hamkorlik platformasi) hamda G20 kabi xalqaro maydonlardagi yaqin hamkorligining ahamiyati yana bir bor tasdiqlanganini ta’kidladi.

Shuningdek, u Koreya universitetida qilgan ma’ruzasida xalqaro tizim duch kelayotgan sinovlar va global boshqaruvning kelajagi haqidagi fikrlarini bildirib, Turkiyaning bu boradagi qarashlarini taqdim etganini qayd etdi.

Fidan o‘z bayonotida yana shunday dedi:

“Shahidlarimiz va faxriylarimizning muqaddas xotirasi ikki mamlakat o‘rtasidagi abadiy do‘stlikning ramzi sifatida kelajak avlodlarga ilhom berishda davom etadi.”

“Kelgusi davrda Turkiya va Koreya Respublikasi o‘rtasidagi strategik sheriklikni o‘zaro manfaatlar asosida yanada chuqurlashtirishda davom etamiz.”