Turkiya Respublikasi Tashqi ishlar vaziri Hakan Fidan Eron Tashqi ishlar vaziri Abbos Aroqchi bilan telefon orqali suhbat o‘tkazdi.
Vazir Fidan erishilgan kelishuvdan mamnun ekanliklarini bildirib, jarayon doirasidagi qo‘shimcha muzokaralar ham ijobiy natija bilan yakunlanishiga umid qilayotganini ta’kidladi.
Shuningdek, u kelishuvni izdan chiqarishga qaratilgan provokatsiyalarga nisbatan ehtiyotkor bo‘lish zarurligini qayd etib, Turkiyaning mintaqada tinchlik, osoyishtalik va barqarorlikni mustahkamlashga qaratilgan sa’y-harakatlarini qat’iyat bilan davom ettirishini bildirdi.
AQSh va Eron kelishuvga erishdi
Pokiston Bosh vaziri Shahboz Sharif AQSh va Eron o‘rtasidagi muzokaralar kelishuv bilan yakunlanganini ma’lum qildi.
Sharif bayonotida shunday dedi:
“Qizg‘in muzokaralardan so‘ng AQSh va Eron o‘rtasida tinchlik kelishuviga erishilganini mamnuniyat bilan e’lon qilamiz. Har ikki tomon Livan ham kiradigan barcha frontlardagi harbiy amaliyotlarni darhol va doimiy ravishda to‘xtatishga qaror qildi. Rasmiy imzolash marosimi 19-iyun, juma kuni Shveysariyada bo‘lib o‘tadi.”
Sharif Turkiyaga minnatdorlik bildirdi
Sharif kelishuvga qo‘shgan hissasi uchun Turkiyaga ham alohida minnatdorlik izhor etdi:
“Mojoroga diplomatik yechim topish yo‘lidagi qat’iy sa’y-harakatlari uchun Amerika Qo‘shma Shtatlari va Eron Islom Respublikasiga minnatdorchilik bildiramiz. Shuningdek, vositachilik jarayonidagi hamkorimiz bo‘lgan Qatar Davlatining qadrli rahbariyatiga ushbu kelishuvga erishishdagi yordami uchun samimiy tashakkurimizni izhor etamiz. Bundan tashqari, ushbu masaladagi ulkan hissalari uchun Saudiya Arabistoni Podshohligi va Turkiya Respublikasining uzoqni ko‘ra oladigan rahbariyatiga alohida minnatdorlik bildiraman.”
Eron AQSh bilan kelishuvga erishilganini tasdiqladi
Eron tashqi ishlar vaziri o‘rinbosari Kazim G‘aribobodiy AQSh bilan kelishuvga erishilganini tasdiqlab, anglashuv memorandumi 19-iyun kuni Shveysariyada imzolanishini ma’lum qildi.
Eronning Tasnim axborot agentligi xabariga ko‘ra, G‘aribobodiy AQSh bilan erishilgan kelishuv yuzasidan bayonot berdi.
U shunday dedi:
“Anglashuv memorandumi matni yakunlandi va Islomobod kelishuv memorandumi bo‘yicha rasmiy imzolash marosimi juma kuni Shveysariyada bo‘lib o‘tadi. Ikki delegatsiya rahbarlari kelgusidagi tartib-taomillarni belgilash maqsadida muzokaralarni davom ettiradi. Shu vaqtgacha AQSh tomonining urushni tugatish, qamalni bekor qilish va muzlatilgan aktivlarni ozod etish bo‘yicha majburiyatlari tasdiqlanadi. 60 kunlik muzokaralar AQShning ushbu majburiyatlarni bajarishiga bog‘liq bo‘ladi.”
G‘aribobodiy, shuningdek, kelishuv imzolanganidan keyingi 60 kun davomida sanksiyalar, yadroviy dastur va iqtisodiy rivojlanish mexanizmlari kabi masalalar muhokama qilinishini qayd etdi.
Kelishuv Livanni ham qamrab olishini ta’kidlagan G‘aribobodiy:
“Livan ham kiradigan turli frontlardagi urush va harbiy amaliyotlar darhol hamda doimiy ravishda to‘xtatilishi bugun kechqurun e’lon qilinadi”, — dedi.
Uning so‘zlariga ko‘ra, kelishuv matnida “Eronning barcha muhim talablari va qarashlari” o‘z aksini topgan. Shuningdek, 19-iyundagi imzolash marosimidan oldin hujjat matni jamoatchilikka e’lon qilinadi.
G‘aribobodiy Isroilning Livanga hujumidan so‘ng Eron Qurolli kuchlari javob zarbasiga tayyorgarlik ko‘rganini bildirib, aynan shu qat’iyat AQSh Prezidenti Donald Trampning Isroilga nisbatan pozitsiyasiga va kelishuv matnidagi ayrim masalalarning oldinga siljishiga ta’sir ko‘rsatganini aytdi.
Shuningdek, u Eron Qurolli kuchlari kelishuvga qaramay, “dushmanning har qanday rejasiga qarshi turish uchun doimo tayyor” ekanini ta’kidladi.
