Times of Israel xabariga koʻra isroillik minglab inson shanba kuni (29.11.2025) Tel - Avivdagi Portugaliya elchixonasi oldida uzun navbatlar hosil qilib, fuqarolik olish uchun ariza topshirdilar.
Katta talablar yoki qiziqish bois elchixona onlayn navbat tizimidagi tigʻizlikni kamaytirish maqsadida maxsus «eski uslubdagi ariza topshirish kuni» tashkil qildi. Ushbu kunda ishtirok etganlarning ayrimlari fuqarolik uchun ariza topshirar ekan, ayrimlari Portugaliya pasportlarini yangilashga urinmoqda. Navbatlar, elchixonaning kirish qismidan tortib yer osti avtoturargohiga qadar choʻzildi.
Isroilliklar nima uchun Portugaliya fuqaroligini olish payida?
Portugaliya 2015 - yili qabul qilingan qonun asosida XVI asrdagi inkvizatsiya davrida zulm koʻrgan sefarad yahudiylari yoki Iberiya yarimoroli yahudiylariga fuqarolik olish huquqini bergan edi. Ammo arizalar sonining ko‘pligi tufayli Portugaliya hukumati 2023 - yili qonun o‘z maqsadiga yetganini ifoda etgan holda talablarga yanada qat’iy shartlar qo‘shdi.
Isroilliklar Portugaliya fuqaroligi orqali Yevropa ittifoqi davlatlarida erkin harakatlanish, kamroq yashash xarajatlari yoki chiqim, Yevropa universitetlariga qulayroq kirish va arzonroq ta’lim to‘lovlari kabi afzalliklarga ega bo‘ladi.
Ayniqsa, 2023 - yilning oktabr oyida Isroilning Gʻazoga qarshi urush boshlatishi ham ikkinchi pasportga bo‘lgan talabni orttirdi. O‘n minglab isroillik mamlakatni tark etar ekan, Portugaliya fuqaroligiga bo‘lgan qiziqish yoki talab ham tobora ortib bormoqda.
