Pokiston va Afg‘oniston o‘rtasidagi to‘qnashuvlar kuchayib borayotgan bir vaqtda, Eron vositachilik taklifini o‘rtaga tashladi. Eron Tashqi ishlar vazirining ushbu taklifi, Islomobod va Kobul orasidagi munosabatlar keskin yomonlashgan pallada yangradi.
Eron Tashqi ishlar vaziri Abbos Aroqchi, Pokiston va Afg‘onistonni kuchayib borayotgan harbiy to‘qnashuvlarni muloqot yo‘li bilan hal qilishga chaqirdi hamda ikki qo‘shni davlat orasidagi so‘zlashuvlarni osonlashtirish uchun Tehronning yordamini taklif qildi.
Aroqchi juma kuni X hisobida shunday yozdi: "Muborak Ramazon oyida, islom olamida nafsni tarbiya qilish va birdamlik mustahkamlanadigan ushbu oyda, Afg‘oniston va Pokiston mavjud kelishmovchiliklarini yaxshi qo‘shnichilik doirasida hamda muloqot orqali boshqarib, hal qilishlari ma’qul bo‘lar edi." Vazir shuningdek: "Eron Islom Respublikasi ikki mamlakat orasidagi muloqotni osonlashtirish va o‘zaro tushunish hamda hamkorlikni kuchaytirish borasida har qanday yordamga tayyordir," deb qo‘shimcha qildi.
Eronlik vazir o‘z xabariga fors shoiri Sa’diy Sheroziydan bir to‘rtlik ilova qildi: "Odam farzandlari bir-birining a’zolaridir; chunki ular yaratilishda bir javhardan bino bo‘lganlar."
Ushbu chaqiriq Islomobod va Kobul orasidagi taranglik shiddatli tus olgan davrga to‘g‘ri keldi. Afg‘on rasmiylariga ko‘ra, Pokiston armiyasi poytaxt Kobul bilan birga Qandahor va Paktiyo viloyatlarini ham o‘z ichiga olgan turli hududlarga havo zarbalari bergan. Mahalliy vaqt bilan tungi soat 02:30 atrofida Kobul markazida ko‘plab yirik portlashlar yuz bergani xabar qilindi. Afg‘on hukumati so‘zchisi hujumlarda qurbonlar bo‘lmaganini aytdi.
Bunga javoban, Pokiston bosh vazirining maslahatchisi Mosharraf Zaydiy, qarshi hujumlar natijasida 133 nafar afg‘on harbiysi halok bo‘lganini va 200 dan ortiq kishi yaralanganini bildirdi. Shuningdek, u 27 ta afg‘on harbiy posti, ikkita korpus qarorgohi va 80 dan ortiq tank hamda zirhli mashina yo‘q qilinganini da’vo qildi. Pokistondagi xavfsizlik manbalari Qandahordagi o‘q-dorilar ombori va logistika bazasi nishonga olinganini ta’kidladi.
Afg‘oniston Mudofaa vazirligi, Afg‘oniston-Pokiston chegarasi bo‘ylab Pokiston marralariga qarshi qaratilgan javob amaliyotlari yarim tunda to‘xtatilganini ma’lum qildi. Shu haftaning boshida, to‘rt soat davom etgan chegara to‘qnashuvida kamida sakkiz nafar afg‘on askari va ikki nafar pokistonlik askar hayotdan ko‘z yumgan edi; bu so‘nggi oylardagi eng og‘ir to‘qnashuvlardan biri sifatida qayd etildi.
Vaziyatning keskinlashishi, Islomobodning o‘tgan hafta o‘tkazilgan havo hujumlarida 70 nafar "terrorchi" o‘ldirilganini e’lon qilganidan so‘ng yuz berdi. BMT Bosh kotibi Antonio Guterrish to‘qnashuvlardan xavotirda ekanini bildirdi. Uning so‘zchisi, Guterrish tomonlarni xalqaro huquq doirasidagi majburiyatlariga amal qilishga va diplomatik yechim izlashga chaqirganini aytdi.
Ikki mamlakat orasidagi aloqalar, Pokistonning "Tehrik-i Tolibon Pokiston" (TTP) guruhiga mansub terrorchilar Afg‘oniston hududidan turib harakat qilmoqda degan iddaosi tufayli yomonlashgan — Kobul esa bu ayblovlarni rad etib keladi.
