Qatar Bosh vaziri va tashqi ishlar vaziri Shayx Muhammad bin Abdulrahmon Al Soniy Eron uchun taklif etilgan 300 milliard dollarlik investitsiya jamg‘armasini "umid qilingan raqam" deb ta’rifladi.
Chorshanba kuni "Financial Times" nashriga bergan intervyusida u, agar Tehron AQSh bilan yakuniy kelishuvga erishsa, Fors ko‘rfazi davlatlari ushbu fondni moliyalashtirishda ishtirok etishi mumkinligini bildirdi. Shayx Muhammad 300 milliard dollarlik mablag‘ qat’iy belgilangan majburiyat emas, balki maqsadli ko‘rsatkich ekanini alohida ta’kidladi.
Xabarlarga ko‘ra, Tramp ma’muriyati ushbu jamg‘armani Fors ko‘rfazi davlatlari orqali moliyalashtirishni, bu orqali esa xorijiy kompaniyalarning Eronga investitsiya kiritishi uchun qulay muhit yaratishni taklif qilgan. Biroq Qatar Bosh vaziri o‘z mamlakatining ushbu loyihadagi aniq moliyaviy ishtiroki borasida oydinlik kiritmadi.
Iqtisodiy o‘sish va kelishuvlar
Shayx Muhammad o‘z bayonotida quyidagilarni qayd etdi: "Bizning maqsadimiz Eronning gullab-yashnashi va iqtisodiy o‘sishidir. Bizning investitsiyaviy qarorlarimiz har doim sof tijoriy manfaatlar asosida qabul qilinadi".
Taklif etilgan moliyalashtirish mexanizmi AQSh va Eron o‘rtasidagi "Islomobod o‘zaro anglashuv memorandumi"ning 6-moddasi bilan chambarchas bog‘liq. Ushbu bandga ko‘ra, AQSh va uning mintaqaviy hamkorlari Eronni qayta tiklash hamda iqtisodiy rivojlantirish uchun kamida 300 milliard dollarlik dasturni amalga oshirish majburiyatini oladi. Memorandum shartlariga ko‘ra, ushbu loyihani amalga oshirish mexanizmi 60 kun ichida rasmiylashtirilishi, AQSh esa barcha zarur moliyaviy operatsiyalar, litsenziyalar va istisnolarni taqdim etishi ko‘zda tutilgan.
