Turkiyaning BMTdagi vakili Isroilning bir tomonli qadamlarining bosib olingan G‘arbiy Sohildagi noqonuniy o‘rnini mustahkamlashga qaratilganini ifoda etib, G‘azo sulhining to‘liq amalga oshirilishi va Isroilning G‘azodan to‘liq chiqib ketishini talab qildi.
Chorshanba kuni Falastindagi vaziyatga bag‘ishlangan BMT Xavfsizlik kengashining yuqori darajadagi yig‘ilishida so‘zga chiqqan Ahmet Yildiz, hammaning e’tibori G‘azodagi nozik sulhga qaratilgan bir paytda “bosqinchi kuch G‘arbiy Sohilda noqonuniy o‘rnini mustahkamlashga qaratilgan bir tomonlama qadamlarni davom ettirmoqda”, - dedi.
Yildiz mavzu haqida shuningdek: “Turkiya 2803 - sonli Xavfsizlik kengashi qarori va AQSh Prezidenti Donald Trampning 20 banddan iborat rejasini ham o‘z ichiga olgan sulh kelishuvlarining to‘liq amalga oshirilishini talab qilmoqda”, - dedi.
Sulhni davom ettirish ko‘proq o‘limlarning oldini olish, insonparvarlik yordami, erta tiklanish sa’y - harakatlari hamda mazmunli siyosiy muloqot uchun hayotiy ahamiyatga ega ekanini ta’kidlagan Yildiz, takroriy hujumlar va insonparvarlik yordamiga qo‘yilgan cheklovlarni qoralab, G‘azoga kiradigan yordam hajmini sezilarli darajada oshirish va uning muammosiz yetib borishini ta’kidladi.
Yildiz tiklanish va qayta qurish jarayonini amalga oshirish uchun Isroilning G‘azodan to‘liq chiqib ketishi zarurligini ifoda etib, Turkiya qayta qurish ishlarida faol rol o‘ynashga tayyor ekanini bildirdi.
Bosib olingan G‘arbiy Sohil masalasida esa Anqaraning Isroil anneksiyasiga qarshi ekanini yana bir bor ta’kidlagan Yildiz: “Har qanday anneksiyaga qat’iyan qarshimiz,” - dedi va Isroilning G‘arbiy Sohildagi o‘rnini kengaytirishga qaratilgan bir tomonlama choralarini “xalqaro huquqning og‘ir buzilishi” deb baholadi.
Yildiz xalqaro hamjamiyat va Xavfsizlik kengashini huquqiy hamda axloqiy mas’uliyatlarini bajarishga chaqirib: “Kengash Isroilni bosib olingan G‘arbiy Sohilda keskinlikni kuchaytirishdan voz kechishga, sulh kelishuvlarini to‘liq amalga oshirishga va noqonuniy bosqinga barham berishga majbur qilishi kerak”, - dedi.
Elchi so‘zlarini: “G‘azodagi sulhdan keyin yuzaga kelgan ijobiy muhit ikki davlatli yechimga olib kelishi lozim. Turkiya bu sa’y - harakatlarda konstruktiv, mas’uliyatli va ishonchli hamkordir”, - deya tamomladi.
