Eron prezidenti Mas’ud Pezeshkiyon mamlakati AQSh bilan urushga intilmayotganini va muzokaralar orqali kelishuvga erishishga tayyorligini bildirdi.
Mas’ud Pezeshkiyon BMT Bosh Assambleyasining 81-sessiyasi ochilish haftasidagi yig‘ilishlarda qatnashish uchun borgan Nyu-York shahrida Fox News savollariga javob berdi.
Eron urushni yoki kelishuvni afzal ko‘rishi haqidagi savolga Pezeshkiyon: “Biz urushni tanlamaymiz. Urush bizga majburan yuklandi, biz urushga intilmayapmiz”, dedi.
Pezeshkiyon Ho‘rmuz bo‘g‘ozidagi kelishmovchiliklar sabab barbod bo‘lgan, biroq undan oldin 60 kun ichida yakuniy tinchlik bitimini tuzishni nazarda tutgan iyun oyidagi kelishuvni eslatib, Tehron Vashington bilan kelishuv sari harakat qilishga tayyorligini ta’kidladi.
Ikki mamlakat o‘rtasidagi keskinlik davom etayotgan bir paytda Eron prezidenti: “Prezidentingiz Donald Tramp bilan kelishuvga erishgan edik. Shu asosda oldinga siljishga tayyormiz va hamon buni istaymiz”, dedi.
Mas’ud Pezeshkiyon 28-fevraldan beri davom etayotgan urushni tugatish yoki davom ettirish borasida tanlov qilishi kerak bo‘lgan tomon AQSh ekanini aytdi.
Eron xalqaro huquq va Yadro qurolini tarqatmaslik to‘g‘risidagi shartnoma (NPT) doirasidagi majburiyatlariga amal qilishini bildirgan Pezeshkiyon Yamandagi husiylar haqida esa: “Husiylar o‘z harakatlari uchun o‘zlari javobgar. Ular bizdan ko‘rsatma olmaydi”, dedi.
Pezeshkiyon tirik yoki tirik emasligi haqida savollar tug‘ilgan Eron rahbari Mujtaba Xomanaiy bilan taxminan bir oy avval “shaxsan” uchrashgani va u bilan qariyb yetti soat vaqt o‘tkazganini aytib, uning sog‘lig‘i “juda yaxshi” ekanini qayd etdi.
