Hindiston sharqidagi davlat shifoxonalaridan birida sodir bo‘lgan yong‘in oqibatida jarohatdan keyingi parvarishlash bo‘limida davolanayotgan kamida 10 nafar og‘ir bemor hayotdan ko‘z yumdi. Mutasaddilar ushbu ma’lumotni tasdiqladi. Hindistonda yong‘inga qarshi uskunalar yetishmasligi va xavfsizlik qoidalariga tez-tez amal qilinmasligi tufayli bino yong‘inlari muntazam ravishda kuzatilib turadi.
Yong‘in dushanba kuni erta tongda Odisha shtatining Kuttak shahridagi "SCB Medical College and Hospital" shifoxonasining birinchi qavatida boshlangan. Odisha Bosh vaziri Moxan Charan Majxi jurnalistlarga bergan bayonotida voqeani tasdiqladi.
"Bemorlar davolanayotgan jarohatdan keyingi reanimatsiya bo‘limida elektr simlaridagi qisqa tutashuv yong‘inga sabab bo‘ldi", dedi Majxi. Uning ta’kidlashicha, voqea sodir bo‘lgan vaqtda ushbu qavatda 23 nafar bemor bo‘lgan. Yong‘inda 10 kishi halok bo‘lgani, qolgan bemorlar esa boshqa bo‘limlarga ko‘chirilgani ma’lum qilindi.
Bemorlarni qutqarishga uringan kamida 11 nafar tibbiyot xodimi ham kuyish jarohatlarini oldi. Hindiston Bosh vaziri Narendra Modi ijtimoiy tarmoqdagi sahifasida ushbu hodisani "chuqur qayg‘uli" deb atadi va halok bo‘lganlarning oilalariga hamdardlik bildirdi.
Modi, shuningdek, jabrlangan oilalarga 2,160 dollar miqdorida tovon puli to‘lanishini e’lon qildi. Sifatsiz saqlangan elektr tarmoqlaridagi qisqa tutashuvlar Hindistondagi yong‘in holatlarining asosiy sababi bo‘lib qolmoqda.
2024-yilda mamlakat janubidagi Tamilnadu shtatida joylashgan xususiy shifoxonadagi yong‘inda kamida olti kishi halok bo‘lgan, yigirmadan ortiq kishi jarohatlangan edi. O‘sha yili shimoliy Uttar-Pradesh shtatidagi shifoxonada sodir bo‘lgan yong‘inda esa 10 nafar chaqaloq nobud bo‘lgan edi.
