Turkiya Prezidenti Rajab Toyyib Erdo‘g‘an Anqarada bo‘lib o‘tgan NATO Davlat va hukumat rahbarlarining 36-yig‘ilishi doirasida Slovakiya Prezidenti Peter Pellegrini bilan uchrashdi. Ikki davlat rahbari o‘zaro aloqalar, shuningdek, mintaqaviy va global voqealar rivojini muhokama qildi.
Turkiya Kommunikatsiyalar direktorati xabariga ko‘ra, payshanba kuni Prezidentlik majmuasida bo‘lib o‘tgan uchrashuvda Erdo‘g‘an ikki mamlakat o‘rtasidagi savdo va investitsiya maqsadlariga erishish uchun sa’y-harakatlarni kuchaytirish zarurligini ta’kidladi. U Turkiya va Slovakiya, ayniqsa, transport va energetika sohalaridagi hamkorlik imkoniyatlaridan kengroq foydalanishi lozimligini qayd etdi.
Shuningdek, Erdo‘g‘an Yevropaning mudofaa salohiyatini mustahkamlashga qaratilgan ishlar NATO faoliyatini to‘ldiruvchi tarzda amalga oshirilishi kerakligini bildirdi.
Mintaqaviy masalalar yuzasidan fikr almashar ekan, Prezident Erdo‘g‘an Turkiya Eron va Ukraina ishtirokidagi mojarolarni to‘xtatish uchun diplomatik sa’y-harakatlarni davom ettirayotganini, shuningdek, G‘azoda tinchlik va barqarorlikni o‘rnatish hamda u yerda yuzaga kelgan insonparvarlik inqirozini bartaraf etish borasida ish olib borayotganini ta’kidladi.
Eslatib o‘tamiz, Turkiya Prezidenti 7–8-iyul kunlari Anqarada NATO sammiti doirasida ittifoqqa a’zo davlatlar rahbarlarini qabul qildi. U mazkur tashriflar davomida mudofaa, xavfsizlik va mintaqaviy muammolar bo‘yicha muzokaralar o‘tkazish bilan bir qatorda bir qator ikki tomonlama uchrashuvlar ham tashkil etdi.
