Turkiyada joylashgan tajriba dizayni kompaniyasi “Outdoor Factory” tomonidan keng ko‘lamda yangilangan O‘zbekiston Davlat tarixi muzeyi UNESCO Jahon merosi qo‘mitasi “Toshkent modernistik me’morchiligi”ni Jahon merosi ro‘yxatiga kiritganidan so‘ng mazkur meros hududining diqqatga sazovor inshootlari qatoridan joy oldi.
1876-yilda tashkil etilgan va O‘zbekistonning eng qadimiy muzeyi hisoblangan O‘zbekiston Davlat tarixi muzeyidagi ko‘rgazma maydonlari, tashrif buyuruvchilar tajribasi va raqamli infratuzilma to‘liq yangilandi.
Qariyb 250 mingta eksponat saqlanayotgan muzeyda raqamli hikoyalash tizimlari, multimedia dasturlari, interaktiv tajriba maydonlari va zamonaviy ko‘rgazma usullaridan foydalanildi. Shu tariqa mamlakat tarixini xronologik tartib asosida tashrif buyuruvchilarga yetkazadigan yangi muzeyshunoslik yondashuvi joriy etildi.
150 yillik muzeyda keng ko‘lamli yangilanish
UNESCO Jahon merosi qo‘mitasining 2026-yil 27-iyuldagi qarori bilan Toshkentdagi modernistik me’morchilik namunalari Jahon merosi ro‘yxatiga kiritilgach, O‘zbekiston Davlat tarixi muzeyi ham ushbu meros hududining e’tiborga molik inshootlaridan biri sifatida xalqaro e’tirofga sazovor bo‘ldi.
150 yillik tarixga ega muzeyda amalga oshirilgan loyiha doirasida nafaqat ko‘rgazma zallari, balki tashrif buyuruvchilarning harakatlanish yo‘nalishi, raqamli materiallar va ta’lim maydonlari ham qayta loyihalashtirildi.
“Outdoor Factory” boshqaruv kengashi raisi To’ygar Yedigo’z Anadolu agentligi muxbiriga bergan bayonotida madaniy merosni nafaqat asrab-avaylash, balki uni kelajak avlodlarga to‘g‘ri usullar yordamida yetkazish ham muhimligini ta’kidladi.
