AQSH prezidenti Donald Tramp Ummon AQSH–Eron muzokaralariga aralashadigan bo‘lsa, unga qarshi harbiy amaliyot o‘tkazish bilan tahdid qildi. U, shuningdek, Vashington Eron Islom inqilobi qo‘riqchilari korpusi vakillari bilan bevosita aloqada ekanini ma’lum qildi.

Tramp dushanba kuni “Fox News” telekanaliga bergan intervyusida Ummonning Eron va Hormuz bo‘g‘ozi bo‘yicha muzokaralardagi roli haqidagi savolga javob berar ekan, “Agar Ummon to‘sqinlik qilsa, uni yer bilan yakson qilamiz”, dedi.

Eron shanba kuni bir necha hafta davom etgan texnik muzokaralardan so‘ng Hormuz bo‘g‘ozidagi kemalar qatnovi yo‘nalishlari xaritasi bo‘yicha Ummon bilan kelishuvga erishilganini ma’lum qilgan edi.

Eron masalasiga ham to‘xtalgan Tramp Tehron “oq bayroq ko‘tarib, taslim bo‘lishi” kerakligini ta’kidlab, “Ular pokerni yaxshi o‘ynaydi, ammo ahvoli tamom”, dedi.

Tramp Vashington va Eron Islom inqilobi qo‘riqchilari korpusi o‘rtasida maxfiy aloqa kanali mavjudligini ham tasdiqladi.

“Bizda Inqilob qo‘riqchilari korpusi bilan norasmiy aloqa kanali bor. Erondagi korpus vakillari bilan bevosita gaplashyapmiz”, dedi AQSH prezidenti.

Isroilning G‘azoga hujumlari

G‘azo masalasida esa Tramp: “Isroil G‘azoga zarba bermasligi kerak. HAMAS qurolsizlanishga rozi bo‘ldi”, dedi.

AQSHning HAMAS bilan ham alohida aloqa kanali borligini bildirgan Tramp, “HAMAS bilan boshqa kanalimiz mavjud va ular oxir-oqibat qurollarini topshiryapti”, deb ta’kidladi.

Isroil siyosatiga oid savolga javoban Tramp mamlakatdagi saylovlardan chetda turishni “eng to‘g‘ri yo‘l” deb bilishini aytdi. Biroq u nomzodlardan birini qo‘llab-quvvatlash ehtimolini ham istisno etmadi.

“Isroil saylovlariga aralashmasligim eng to‘g‘ri qaror, deb o‘ylayman. Ammo biror nomzodni qo‘llab-quvvatlashim mumkin”, dedi Tramp.