AQSH va Eron vaqtinchalik sulh bo‘yicha kelishuvga erishganidan so‘ng, Isroil Livanga bomba yog‘dirdi. Atigi 10 daqiqa ichida 300 dan ortiq livanlik halok bo‘ldi va 1200 ga yaqin kishi jarohatlandi. Shundan so‘ng, Osif Isroilni "saraton" va "insoniyat uchun la'nat" deb ta'rifladi.
Vazir payshanba kuni X tarmog‘ida shunday yozdi: "Isroil yovuzdir va insoniyat uchun la'natdir; Islomobodda tinchlik muzokaralari davom etayotgan bir paytda, Livanda qirg'in amalga oshirilmoqda. Begunoh fuqarolar Isroil tomonidan o‘ldirilmoqda; avval G'azo, keyin Eron va endi Livan; qon to‘kilishi to‘xtovsiz davom etmoqda."
Xavaja Muhammad Osif so‘zlarini shunday davom ettirdi: "Yevropalik yahudiylardan qutulish uchun Falastin tuproqlarida ushbu saraton davlatini qurganlar jahannamda yonishini umid qilaman va duo qilaman."
Eron shu haftada, AQSH prezidenti Donald Trampning mamlakatni yo‘q qilish haqidagi tahdidlaridan so‘ng, Pokiston vositachiligida AQSH bilan ikki haftalik mo‘rt sulhga rozi bo‘ldi. AQSH va Eron rasmiylari shanba kuni ushbu maxfiy muzokaralarga mezbonlik qilgan Islomobodda uchrashishi rejalashtirilgan.
Biroq Isroil, Pokiston AQSH va Eron o‘rtasida sulh e’lon qilganidan so‘ng, Livandagi 100 dan ortiq hududni bombardimon qildi. Bu 1990-yildagi fuqarolar urushi tugaganidan beri mamlakatdagi eng yirik qirg‘inlardan biri bo‘ldi. Mahalliy OAV xabariga ko‘ra, asosan tinch aholi vakillari halok bo‘lgan ushbu hujumlardan g‘azablangan Pokiston, Isroildan qirg‘inlarni darhol to‘xtatishni talab qildi va bu harakatlar AQSH-Eron muzokaralariga putur yetkazishi mumkinligidan ogohlantirdi.
Islomobod va Eron Livanning ushbu sulh kelishuvining bir qismi ekanini aytmoqda, ammo Isroil va AQSH buni rad etmoqda. Bayrut esa Pokistondan Livanni kelishuv doirasida saqlab qolishni so‘radi.
Shu bilan birga, Netanyaxuning idorasi Osifga javoban shunday dedi: "Isroilni yo‘q qilishga chaqiriq juda og‘ir holat. Bu har qanday hukumatdan, ayniqsa tinchlik uchun betaraf hakamlikka da’vo qilayotgan hukumatdan qabul qilinadigan gap emas." Isroil Tashqi ishlar vaziri Gideon Saar esa: "Yahudiy davlatini 'saraton' deb atash, aslida uni yo‘q qilishni istashdir. Isroil o‘zini yo‘q qilishga qasam ichgan terrorchilardan himoya qiladi," deb qo‘shimcha qildi.
