Yaponiya Bosh vaziri Sanae Takaichi Tayvan masalasiga oid bayonotlari sabab ikki davlat o‘rtasidagi taranglik davom etayotgan bir vaqtda, Xitoy bilan muloqotga chaqiruvini yana takrorladi.
Dushanba kuni yangi yilning ilk matbuot anjumanida hukumat ustuvor yo‘nalishlari haqida so‘zlar ekan, Takaichi ikki mamlakat o‘rtasidagi tashvish va qiyinchiliklarni muhokama qilishda muloqot muhimligini ta’kidladi.
Kyodo axborot agentligiga ko‘ra, Takaichi: “Mamlakatimiz Xitoy bilan turli muloqot imkoniyatlariga ochiq va hech qachon eshikni yopmagan”, — degan.

Takaichining bu so‘zlari Xitoyning Yaponiyadagi elchixonasi shanba kuni e’lon qilgan bayonotidan keyin yangradi. Bayonotda Yaponiyaning ayrim hududlarida jamoat xavfsizligi sharoitlari so‘nggi paytlarda yomonlashgani qayd etilib, Xitoy fuqarolariga yaqin kelajakda Yaponiyaga safar qilmaslik tavsiya etilgan.
Xitoy elchixonasining ushbu so‘nggi bayonotiga Yaponiya rasmiylaridan hozircha javob berilmadi.

Takaichi o‘tgan yilning 7 noyabrida Xitoyning Tayvanga ehtimoliy hujumi qonuniy jihatdan “hayotiy xavf tug‘diradigan holat” bo‘lishi mumkinligini va bu Yaponiyaga jamoaviy o‘zini himoya qilish huquqidan foydalanish imkonini berishini aytganidan beri, Xitoy va Yaponiya o‘rtasidagi taranglik kuchayib bordi.
Takaichining bayonotlari Pekinda keng miqyosda norozilik bilan qarshi olinar ekan, Xitoy Yaponiyaga safar qilmaslik bo‘yicha tavsiyalar berdi hamda dengiz mahsulotlari importiga qayta taqiq joriy etish kabi turli cheklovchi choralarni amalga oshirdi.