Turkiyaning yetakchi aviatsiya, texnologiya va kosmik texnologiyalar festivali TEKNOFEST kecha, 17 sentyabr chorshanba kuni Istanbul shahrida o‘z eshiklarini ochdi.
Besh kun davom etadigan tadbir Istanbuldagi Ataturk xalqaro aeroportida bo‘lib o‘tmoqda. Mazkur nufuzli festival Turkiya Texnologiya Jamoasi Jamgʻarmasi (T3) hamda Turkiya Sanoat va Texnologiya vazirligi tomonidan tashkil etilgan.
TEKNOFEST 2018-yildan beri muntazam ravishda o‘tkazilib kelinmoqda. Bu tadbir har yili davlat idoralari, xususiy kompaniyalar, vazirliklar va ilmiy muassasalar bilan hamkorlikda o’tkaziladi.
TEKNOFEST festivalida bu yil 58 ta yo’nalishda tanlovlar va 137 ta toifada ilmiy tadbirlar bo’lib o’tadi. Shuningdek, seminarlar, mukofotlar qoʻyilgan texnologiya tanlovlari, mahalliy texnologiya koʻrgazmalari tashkil etilgan.
Tadbir davomida dunyoning turli burchaklaridan kelgan ishtirokchilar o‘z bilim va tajribalarini bo‘lishib, texnologiya rivojlanishida muhim yutuqlarga erishish imkoniyatiga ega bo‘lishadi.
Texnologiya, hayajon va parvozlar
TEKNOFEST yakshanba kunigacha tashrif buyuruvchilarni nafaqat texnologiya musobaqalari, balki turli xil ajoyib tadbirlar bilan ham kutib olmoqda.
Festivalda hayratlanarli havo shoular, turli ko‘rgazmalar va mahorat darslari, immersiv simulyatsiya zonalari, planetarium, savdo yarmarkalari hamda maxsus talabalar uchun parvoz tadbirlari o‘tkazilib, texnologik va hayajonli tajribalar bir joyga jamlangan.
Tadbir an’anaviy ravishda juft yillarda Turkiyaning turli shaharlarida, toq yillarda esa Istanbulda o‘tkaziladi.
Festival, shuningdek, ikki xorijiy mamlakatda ham o‘tkazilgan: Ozarbayjon va Shimoliy Kipr Turk Respublikasida.
O‘tgan oy Istanbulda TEKNOFESTning dengizga bag‘ishlangan "Moviy Vatan" tadbiri o‘tkazildi.
O‘tgan yili Turkiyaning Adana shahrida o‘tkazilgan TEKNOFEST taxminan 1,1 million mehmonni jalb qilgan bo‘lsa, umumiy tashrif buyuruvchilar soni hozirgacha 11 milliondan oshdi.
