Milliy xavfsizlik kengashi Turkiya Prezidenti Rajab Toyyib Erdo‘g‘on raisligida Prezidentlik majmuasida yig‘ildi. Taxminan ikki soat davom etgan yig‘ilishdan so‘ng e’lon qilingan bayonotda terrorizmga qarshi kurash, mintaqaviy rivojlanishlar va tashqi siyosat masalalari muhokama qilingani bildirildi.
Bayonotda PKK/KJK-PYD/YPG, FETO va DEASH boshchiligidagi tuzilmalarning Turkiyaning milliy birligi va hududiy yaxlitligiga tahdidlariga qarshi mamlakat ichida va tashqarisida olib borilayotgan faoliyatlar baholanganligi qayd etildi. “Terrorsiz Turkiya” va “Terrorsiz mintaqa” maqsadlari doirasidagi ishlarga urg‘u berilib, terrorizmning mamlakat va mintaqa zimmasidagi yukini bartaraf etish borasidagi qat’iy iroda yana bir bor tasdiqlandi.
Uyushgan jinoyatchilikka qarshi kurash doirasidagi operatsiyalar ham muhokama qilingan yig‘ilishda fuqarolarning tinchligi va xavfsizligini ta’minlashga qaratilgan qat’iy qadamlar davom ettirilishi qayd etildi. Shuningdek, Turkiyaning kafil davlat sifatida Shimoliy Kipr turklarining xavfsizligi va farovonligini himoya qilish borasidagi qat’iy pozitsiyasi tasdiqlandi.
Bayonotda Eron va AQSh o‘rtasida erishilgan kelishuv mamnuniyat bilan kutib olingani, jarayonning uzluksiz davom etishi muhim ekani ta’kidlandi. Turkiyaning mintaqaviy tinchlik va barqarorlikka hissa qo‘shishda davom etishi qayd etildi.
Suriyada barqarorlikni ta’minlashga qaratilgan ijobiy o‘zgarishlar mamnuniyat bilan qarshi olinib, mamlakatning birligi va hududiy yaxlitligini qo‘llab-quvvatlash davom ettirilishi bildirildi.
Bayonotda, shuningdek, Isroilning G‘azo, G‘arbiy Sohil, Sharqiy Quddus va Livandagi harakatlari mintaqaviy tinchlik sa’y-harakatlariga zarar yetkazayotgani ta’kidlanib, xalqaro hamjamiyat prinsipial pozitsiya egallashga chaqirildi.
Iroq bilan strategik hamkorlik yangi hukumat davrida ham davom ettirilishi qayd etilar ekan, Rossiya-Ukraina urushida adolatli va barqaror tinchlikka erishish uchun tomonlarga murojaat qilindi. Afrika va Janubiy Kavkazdagi jarayonlar ham muhokama qilinib, Turkiyaning tinchlik, barqarorlik va hamkorlikni qo‘llab-quvvatlash siyosatini davom ettirishi bildirildi.
