Rossiya rasmiylari so‘nggi vaqtlarning eng uzoq davom etgan uchuvchisiz uchish apparatlari hujumi paytida Qrimda bir bola yaralanganini aytdi. Hujumlar Rossiya va Ukraina urushini yakunlash uchun Jenevada o‘tkaziladigan diplomatik uchrashuvlar arafasida sodir bo‘ldi.
Rossiya Mudofaa vazirligi seshanba kuni davlat mediasiga bergan bayonotida, Kiyev Jeneva muzokaralari oldidan qarshi hujumlarini kuchaytirishi bilan birga, Rossiya tun davomida Ukrainaning 150 tadan ortiq dironini qaytarganini ma’lum qildi. Vazirlik havo mudofaa kuchlari tun davomida Rossiya hududlari ustida hamda Qora dengiz va Azov dengizi kengliklarida Ukrainaga tegishli 151 ta uchuvchisiz uchish apparatini yo‘q qilganini bildirdi.
Rossiya tomonidan qo‘shib olingan Qrimdagi Sevastopol shahri hokimi Mixail Razvojayev so‘nggi vaqtlarning eng uzoqlaridan biri deb atalgan ushbu hujumlarda o‘nlab dironlar urib tushirilganini aytdi. Razvojayev Telegram orqali qilgan chiqishida, afsuski yaralanganlar borligini va dastlabki ma’lumotlarga ko‘ra bir bola jarohatlanganini qayd etdi.
Oq uy vositachiligida bundan avval ikki marta o‘tkazilgan yig‘ilishlarda hech qanday ijobiy natijaga erishilmagan edi. Tomonlar seshanba kuni Amerika Qo‘shma Shtatlari ko‘magida yangi diplomatik muzokaralar bosqichini boshlaydilar. Rossiya Ukraina hududining taxminan beshdan bir qismini egallab turgan bo‘lsa-da, Kiyev so‘nggi vaqtlarda urush maydonida biroz ilgarilashga erishdi. Urushni o‘rganish instituti ma’lumotlari asosida o‘tkazilgan tahlillarga ko‘ra, Ukraina chorshanba va yakshanba kunlari oralig‘ida 201 kvadrat kilometrlik maydonni qayta egallagan.
