Rossiya Mudofaa vazirligi Ukrainaning Xerson viloyatidagi Oleshki shahrida insonparvarlik operatsiyasi o‘tkazilishi munosabati bilan Xerson yo‘nalishida vaqtinchalik o‘t ochishni to‘xtatish rejimi boshlanganini ma’lum qildi.
Vazirlik bayonotida Oleshki shahridagi vaziyat haqida ma’lumot berildi.
Bayonotda: “Rossiya Qurolli kuchlari Xerson viloyatining Oleshki aholi punktida insonparvarlik operatsiyasiga tayyorgarlik ko‘rish doirasida Xerson yo‘nalishida Moskva vaqti bilan soat 04.00 dan boshlab o‘t ochishni to‘xtatdi”, deyiladi.
Rossiya Bosh shtabi boshlig‘i Valeriy Gerasimov o‘tgan hafta Xerson viloyatidagi Oleshki shahrida o‘tkaziladigan insonparvarlik operatsiyasi munosabati bilan 27-oktabrdan boshlab Xerson yo‘nalishida vaqtinchalik o‘t ochishni to‘xtatish rejimi joriy etilishini bildirgan edi.
Rossiya Mudofaa vazirligi ham kecha Oleshki shahri yo‘nalishida minalardan tozalash ishlari davom etayotganini ma’lum qilgan edi.
