Falastinning Quddus gubernatorligi Isroilning al - Aqso jome’ masjidi yaqinidagi taxminan 20 ta mulkni musodara qilish rejasi ustidan ogohlantirib, vaziyatni «yangi mustamlakachilikning keskinlashuvi» sifatida baholadi.
Gubernatorlik shanba kuni (16.05.2026) mavzu haqida bergan bayonotida: «Isroil hukumati yakshanba kuni (17.05.2026) al - Aqso jome’ masjidiga tutashgan Bob as -Silsila mahallasidagi falastinliklarga tegishli mulklarni musodara qilish, aholini majburan ko‘chirish va yahudiy posyolkalarini kengaytirish uchun falastinlik savdogarlarga qarashli do‘konlarni bo‘shatishga qaratilgan rejani tasdiqlashga tayyorlanmoqda» - dedi.
Bayonotda nishonga olingan hududda ayyubiylar, mamluklar va o‘smonlilar davriga oid binolar hamda islomiy vaqf mulklari bilan birga falastinliklarga tegishli 15 dan 20 tagacha mulk borligi qayd etildi.
Gubernatorlik Bob as - Silsila mahallasi al - Aqso jome’ masjidiga olib boruvchi eng muhim kirish yo‘llaridan biri ekanini ta’kidlab, ushbu hududning nishonga olinishi bosib olingan Sharqiy Quddusdagi Eski shaharda yahudiylashtirish siyosatini kuchaytirish va al - Aqso jome’ masjidi atrofini falastinlik aholiden tozalash urinishlarining bir qismi ekanini bildirdi.
Gubernatorlik bu rejani «Eski shaharning yuragini nishonga olgan, majburiy ko‘chirishning yangi bosqichiga yo‘l ochadigan va tarixiy falastinlik mulklari ustidan nazoratni kuchaytiradigan xavfli mustamlakachilik eskalatsiyasi» deb baholadi.
Quddusning Eski shahri hududida joylashgan al - Aqso jome’ masjidi islom dinining uchinchi eng muqaddas maskani hisoblanadi.
So‘nggi yillarda Isroil va ko‘chmanchi tashkilotlar ishg‘ol ostidagi Sharqiy Quddusda, ayniqsa Eski shahar, Shayx Jarroh va Silvan mahallalarida, falastinliklarga tegishli mulklarni chiqarib yuborish qarorlari va mulk da’volari orqali egallab olish harakatlarini kuchaytirgani aytilmoqda.
Birlashgan Millatlar Tashkiloti ishg‘ol ostidagi Falastin hududlaridagi posyolkalarni «noqonuniy» deb hisoblaydi va ularning ikki davlatli yechim imkoniyatini zaiflashtirayotgani haqida ogohlantiradi.
Falastin va Isroildagi inson huquqlari tashkilotlari Isroil hukumatini bosib olingan Quddusda falastinliklarning qurilish faoliyatini cheklash uchun bosim o‘tkazishda, shu bilan birga shahardagi noqonuniy posyolkalarni kengaytirishda ayblamoqda.
