Fransiya Prezidenti Emmanuel Makron Livan Madaniyat vaziri Gassan Salame bilan qatnashgan tadbirlardan birida «ishg‘ol» xavfsizlikni kafolatlay olmasligi haqida ogohlantirdi.
Makron dushanba kuni (23.03.2026) Parijda davlat tomonidan qo‘llab - quvvatlangan Arab dunyosi institutida bo‘lib o‘tgan ko‘rgazma ochilishida so‘zga chiqib, «Hech qanday bosib olish, hech qanday mustamlakachilik shakli — na bu yerda, na (ishg‘ol ostidagi) G‘arbiy Sohilda, na boshqa joyda — hech kimning xavfsizligini ta’minlay olmaydi» - dedi.
Makron bu haqida Livan Madaniyat vaziri Gassan Salame bilan birga bo‘lgan paytda va Isroil tomonidan Livanga qarshi urush olib borilayotgan bir davrda gapirdi.
Livan hududiga qarshi havo hujumlari uyushtirgan Isroil, keyinchalik o‘z armiyasining quruqlikdagi qo‘shinlarini Livanning janubiga yubordi va buni «cheklangan» hujum sifatida baholadi.
Livan rasmiylariga ko‘ra Isroil hujumlari 1000 dan ortiq insonning halok bo‘lishiga sabab bo‘lgan.
Bosib olingan G‘arbiy Sohilda Isroil zo‘ravonligi
Shu bilan birga, joriy yilning 28 - fevrali kuni AQSh va Isroil tomonidan Eronga qarshi urush boshlatilganidan beri Isroil hujumlarida ishg‘ol ostidagi G‘arbiy Sohilda falastinlik kamida 6 kishi halok bo‘ldi. Hududda ayrim binolar va avtomobillar noqonuniy isroillik ko‘chmanchilar tomonidan yoqib yuborildi.
Makron xalqaro huquqqa rioya qilishga chaqirib, «Ba’zi insonlar bizni xavfsizlik faqat qo‘rqinchli qo‘shnini bosib olish orqali ta’minlanishiga ishontirmoqchi bo‘lgan bir paytda, Livan bizga bir narsani eslatib qo‘ydi. Ya’ni, universallikning kuchini», - dedi.
Parijdagi ko‘rgazmada esa miloddan avvalgi 6900 - yildan buyon aholi yashab kelayotgan va dunyoning eng qadimiy portlaridan biri hisoblangan Livandagi Biblos shahriga oid turli arxeologik topilmalar namoyish etildi.
