Isroil sudi G‘azo flotiliyasi faollarining hibs muddatini uzaytirdi.

Isroil sudi G‘azo sektoriga gumanitar yordam olib ketayotgan flotillaning ikki nafar xorijlik faolini hibsda saqlash muddatini yakshanba kuniga qadar uzaytirdi.

Bu haqda ularning huquqlarini himoya qilayotgan tashkilot ma’lum qildi. Hozirda rasmiylar ushbu shaxslarni so‘roq qilishda davom etmoqda.

Ispaniya fuqarosi Saif Abu Keshek va braziliyalik Tiago Avila o‘tgan hafta so‘roq qilinishi uchun Isroilga keltirilgan edi. Seshanba kuni ular Ashkelon shahridagi sudda ikkinchi marta eshituvga chiqarildi.

Isroil janubidagi qamoqxonada saqlanayotgan bu ikki faol o‘tgan payshanba kuni Gretsiya qirg‘oqlaridan uzoqdagi xalqaro suvlarda Isroil kuchlari tomonidan to‘xtatilgan flotillaning o‘nlab a’zolari orasida edi. Dastlabki sud majlisida ularning hibsi ikki kunga uzaytirilgan bo‘lsa, seshanba kuni o‘tgan navbatdagi eshituvda faollar sud zaliga oyoqlari bog‘langan holda keltirildi.

«Sud ularning hibsda qolishini yakshanba tongigacha ma’qulladi», — dedi Isroildagi «Adalah» huquqni muhofaza qilish markazining koordinatori Miriem Azem AFP agentligiga bergan intervyusida.

Qiynoqlar va ochlik e’lon qilinishi haqidagi da’volar «Adalah» tashkilotining ma’lum qilishicha, har ikki faol olti kundan buyon ochlik e’lon qilgan. Tashkilot dushanba kuni mahbuslarning qamoqxonada jismoniy va ruhiy bosimlarga duchor bo‘layotganini bildirdi.

Huquq himoyachilariga ko‘ra, Abu Keshek va Avila alohida kameralarda saqlanmoqda. Ularning kameralarida yuqori intensivlikdagi chiroqlar doimiy yoqib qo‘yilgani, Avila esa o‘ta sovuq haroratli joyda saqlanayotgani aytilmoqda. Shuningdek, faollar hujradan tashqariga yoki tibbiy ko‘rikka olib chiqilganda doim ko‘zlari bog‘langan holatda bo‘lishi ta’kidlangan. Isroil rasmiylari qiynoqlar haqidagi ushbu da’volarni rad etmoqda.

Ayblar va huquqiy bahslar Davlat prokuraturasi faollarni «urush paytida dushmanga yordam berish» hamda «terrorchi tashkilotga a’zolik va unga xizmat ko‘rsatish» kabi og‘ir jinoyatlarda ayblamoqda. Biroq «Adalah» advokatlari bu ayblovlarni asossiz deb hisoblab, Isroil yurisdiksiyasiga qarshi chiqishmoqda. Ularning fikricha, faollarning xalqaro suvlarda ushlanishi «noqonuniy o‘g‘irlab ketish» hisoblanadi.

Isroil Tashqi ishlar vazirligi bayonotiga ko‘ra, bu shaxslar «Xorijdagi falastinliklar xalqaro konferensiyasi» (PCPA) tashkiloti bilan aloqador. Vashington ushbu guruhni Xamas harakati manfaatlari yo‘lida yashirin faoliyat yuritishda ayblab keladi.

Flotillaning maqsadi Fransiya, Ispaniya va Italiyadan yo‘lga chiqqan gumanitar kemalar Isroil blokadasini buzib, G‘azo sektoridagi aholiga yordam yetkazishni maqsad qilgan edi. Biroq Isroil harbiylari ularni Gretsiya yaqinida to‘xtatib qoldi.

Eslatib o‘tamiz, Isroil 2007-yildan buyon G‘azoga kirish yo‘llarini to‘liq nazorat qiladi va hudud qat’iy blokada ostida qolmoqda. 2023-yil oktabrida boshlangan keng ko‘lamli harbiy harakatlar va blokada natijasida G‘azoda oziq-ovqat, dori-darmon va hayotiy muhim ashyolarning o‘tkir taqchilligi yuzaga kelgan.