Turkiya tomonidan yuborilgan o’n yettinchi “Yaxshilik kemasi” seshanba kuni mamlakat janubidagi Mersin xalqaro portidan Misrning Al-Arish portiga yo‘l oldi. Kema G‘azo aholisi uchun zarur ehtiyojlarni qondirish maqsadida taxminan 900 tonna gumanitar yordamni o’z ichiga oladi.
Yordam yuklari Turkiya Favqulodda vaziyatlar va tabiiy ofatlar boshqarmasi (AFAD) koordinatsiyasi ostida va Misr Qizil Yarim Oy tashkiloti hamkorligida tashkillashtirilgan bo‘lib, 17 ta nohukumat tashkilotning hissasi bilan ta’minlandi.
Gumanitar yordam yuklari Misrning Al-Arish porti orqali G‘azoga eng yaqin joylashgan Karem Abu-Salem chegara punkti orqali yetkaziladi.
G‘azo aholisi uchun tayyorlangan yordam paketlari ichida tayyor ovqatlar, konservalar, chaqaloqlar uchun sut aralashmalari va bolalar gigiyenasiga oid buyumlar mavjud.
Mersin portida o‘tkazilgan kuzatish marosimida Turkiya Ichki ishlar vaziri Ali Yerlikaya quyidagicha bayonot berdi:
“Bugun biz yana bir marta ‘Yaxshilik kemasi G‘azoga yo‘l oldi’ deymiz. O‘rta Yer dengizida suzayotgan bu kema 900 tonna oziq-ovqat, konservalar va chaqaloqlar uchun sut aralashmalari bilan to‘la holda G‘azoga yo‘lga chiqmoqda,” — dedi Yerlikaya.
2023-yil 7-oktabrda Isroilning G‘azoga qarshi genotsid darajasidagi hujumlari boshlanganidan buyon, Turkiya AFAD koordinatsiyasi ostida 16 ta kema va 14 ta samolyot orqali G‘azoga gumanitar yordam yetkazdi.
O‘tgan hafta AQSh Prezidenti Donald Trampning urushni doimiy ravishda tugatish rejasiga binoan sulhga erishildi. Mazkur urush 67 mingdan ortiq falastinlikning hayotiga zomin bo‘ldi va G‘azo hududining katta qismini vayronaga aylantirdi.
