BMT Isroildan gumanitar flotiliya faollarini ozod qilishni va qo’pol muomala holatlari bo‘yicha tergov o‘tkazishni talab qildi.

Birlashgan Millatlar Tashkiloti Isroil hukumatini G‘azoga yo‘l olgan insonparvarlik flotiyasi a’zolari orasidan qo‘lga olingan ikki faolni zudlik bilan ozod qilishga chaqirdi. Shuningdek, BMT ularga nisbatan jiddiy badmuomala qilingani haqidagi "tashvishli xabarlar" yuzasidan tergov o‘tkazilishini talab qildi.

Ispaniya fuqarosi Saif Abu Keshek va braziliyalik Tiago Avila hozirda Ashkelondagi qamoqxonada saqlanmoqda. Ular o‘tgan payshanba kuni Gretsiya qirg‘oqlaridan tashqaridagi xalqaro suv havzasida Isroil kuchlari tomonidan to‘xtatilgan flotiliya tarkibida bo‘lgan.

"Isroil xalqaro suvlarda hibsga olingan va mamlakat hududiga majburan olib kelingan 'Global Sumud' flotillasi a’zolari Saif Abu Keshek va Tiago Avilani zudlik bilan va shartlarsiz ozod qilishi lozim. Hozirda ular hech qanday rasmiy ayblovsiz ushlab turilibdi", — deyiladi BMT Inson huquqlari bo‘yicha oliy komissari boshqarmasi vakili Tamin Al-Xitanning chorshanba kungi bayonotida.

Vakilning ta’kidlashicha, G‘azo aholisi o‘ta og‘ir vaziyatda qolgan bir paytda ularga gumanitar yordam yetkazishga urinish va birdamlik bildirish jinoyat hisoblanmaydi.

Fransiya, Ispaniya va Italiyadan yo‘lga chiqqan kema karvoni Isroilning G‘azo sektoriga o‘rnatgan blokadasini yorib o‘tib, urushdan jabr ko‘rgan hududga gumanitar yordam yetkazishni maqsad qilgan edi. Avila va Abu Keshekning advokatlari ularga nisbatan jismoniy tazyiq o‘tkazilganini ma’lum qildi; mahbuslar bunga norozilik sifatida olti kundan buyon ochlik e’lon qilmoqda.

Al-Xitan qiynoq va badmuomala haqidagi xabarlarni qoralab, ushbu holat bo‘yicha shaffof tergov o‘tkazishga hamda aybdorlarni javobgarlikka tortishga chaqirdi.

"Biz Isroildan xalqaro inson huquqlari normalariga zid bo‘lgan asossiz hibsga olishlarni hamda terrorizmga oid noaniq qonuniy ta’riflardan foydalanishni to‘xtatishni talab qilamiz. Shuningdek, Isroil G‘azo qamaliga chek qo‘yishi va mintaqaga yetarli miqdordagi insonparvarlik yordami kirishini ta’minlashi lozim", — deya qo‘shimcha qildi BMT vakili.