Vitse-prezident Jevdet Yilmaz Turkiya va Shimoliy Kipr Turk Respublikasi hamkorlikni rivojlantirishda davom etishini hamda mart oyi oxirigacha yangi iqtisodiy bitimni yakunlashini bildirdi. Payshanba kuni Anqarada SHKTR Bosh vaziri Unal Ustel bilan uchrashuvdan so‘ng matbuot xodimlariga bergan bayonotida Yilmaz, muzokaralarni samarali deb baholadi va yangi iqtisodiy hamda moliyaviy hamkorlik doirasi ustida ishlar davom etayotganini aytdi.
"Bizning maqsadimiz aniq va ravshandir. Biz SHKTRni ancha farovon va kuchli kelajakka olib chiqmoqchimiz", – dedi Yilmaz. Turkiya va SHKTR o‘rtasidagi aloqalar "ikki davlat o‘rtasidagi oddiy munosabatlar emasligini" urg‘ulagan Vitse-prezident, kafil davlat sifatida Turkiya doimo SHKTRning yonida bo‘lishini qo‘shimcha qildi.
Yilmaz amaldagi hamkorlik bayonnomasi samarali tatbiq etilayotganini va har ikki tomon mart oyi oxirigacha yangi bitim bo‘yicha muzokaralarni yakunlashni maqsad qilganini ma’lum qildi. Kipr masalasiga to‘xtalar ekan, u har qanday yechim "orol haqiqatlariga", "ikki davlat va ikki xalq" hamda suveren tenglik tamoyillariga asoslanishi kerakligini ta’kidladi.
Uchrashuvdan so‘ng so‘zga chiqqan SHKTR Bosh vaziri Unal Ustel ham mintaqadagi so‘nggi o‘zgarishlarga, xususan, Gretsiya, Isroil va Janubiy Kipr Rum ma’muriyati o‘rtasida imzolangan mudofaa bayonnomasiga to‘xtalib o‘tdi. Ustelning so‘zlariga ko‘ra, ushbu davlatlar mudofaa bitimini imzolaganlaridan so‘ng qurollanish poygasiga kirishgan va yangi harbiy vositalarni namoyish qilish uchun matbuotda turli chiqishlar qilmoqda.
Kipr turklari "yolg‘iz emasligini" ta’kidlagan Ustel, Turkiya Respublikasi SHKTRning ona vatani sifatida doimo qo‘llab-quvvatlashini bildirdi. U uch tomonlama mudofaa hamkorligiga ishora qilib: "Nima qilishsa qilishsin. Biz ham vaqti kelganda ularga munosib tarzda javob qaytarishimizga hech qanday shubha yo‘q", – dedi. Ustel ham orolda ikki xalq va ikki davlat mavjudligini hamda har qanday yechim ushbu haqiqatni aks ettirishi lozimligini yana bir bor takrorladi.
